Taqıyatas rayonında isbilermenlikti rawajlandırıw, jeke menshik sektordıń jumısın jáne de jetilistiriw hám jańa jumıs orınların jaratıw maqsetinde qurılıs tarawında keń kólemli jumıslar ámelge asırılmaqta. Bul processte aymaqtaǵı isbilermenlik subektleri ushın zamanagóy hám turaqlı infrastruktura jaratıwǵa ayrıqsha itibar qaratılmaqta.
Ásirese, kishi hám orta biznes wákilleri ushın arnawlı sanaat zonaları shólkemlestirilip, olarda jańa óndirislik imaratlar, sawda kompleksleri hám xızmet kórsetiw obektleri qurılmaqta.
Búgingi kúnde Taqıyatas rayonındaǵı qurılıs jumısları tek ǵana ekonomikalıq ósiwdi támiyinlew emes, al jeke menshik sektor arqalı xalıqtıń dáramat dáreklerin keńeytiw hám aymaqtı unamlı investiciyalıq ortalıqqa aylandırıwǵa qaratılǵanı menen áhmiyetli.
Solardıń biri «Tazabay Stroy» JShJ bolıp, isbilermen tárepinen rayon orayınan iri sawda orayınıń qurılıs jumısları jedellik penen alıp barılmaqta.
-Jańa oray ulıwma maydanı 2433 kvadrat metr aymaqta jaylasadı. Onda jeke tártiptegi sawda dúkanları, turmıslıq xızmet kórsetiw shaqapshaları, azıq-awqat hám azıq-awqat emes bólimleri, ulıwma awqatlanıw orınları (kafe hám asxanalar), sonday-aq, balalar hám shańaraqlar ushın dem alıw orınlarınıń jumıs alıp barıwı rejelestirilgen. Sawda orayın tolıq zamanagóy arxitekturada, qáwipsizlik hám qolaylıq talaplarına juwap beretuǵın tárizde qurıwdı rejelestirgenbiz. Barlıq pavilonlar elektr, suw, kanalizaciya hám internet tarmaqlarına jalǵanadı,-deydi «Tazabay stroy»JShJ baslıǵı Tazabay Kazakov.
Sonday-aq, xalqımızdı sapalı turaq jay menen támiyinlew, olar ushın zamanagóy, barlıq qolaylıqlarǵa iye turaq jaylardı qurıw baǵdarında keń kólemli ilajlar ámelge asırılmaqta. Rayondaǵı “Taqıyatas” mákan puqaralar jıyını aymaǵında kóp qabatlı turaq jay qurılısı baslanıp, ol jerde 5 qabatlı 45 kvartiralı jańa turaq jay imaratın qurıp pitkeriw názerde tutılǵan. Házirgi waqıtta qurılıs jumısları jedel alıp barılmaqta.

Qaraqalpaqstan xabar agentligi