Ádette onsha itibar bermeytuǵın hár qıylı joqarı dawıslar, shawqımlar insan salamatlıǵına zıyan keltiredi. Búgingi kúnde kóshelerdegi shawqımlar ólshemi 50-60 decibelge shekem jetedi.

Maǵlıwmatlarǵa qaraǵanda, 42 decibelden joqarı shawqım uyqısızlıq, nerv buzılıwı ushın jeterli boladı eken. 70-90 decibelge shekemgi shawqım bolsa nervlerdiń zorıǵıwına, 120 decibeldegi shawqım bolsa nerv keselliklerin júzege keltiriwge sebep boladı. Sonıń ushın da xalıqtı shawqımnıń zıyanlarınan qorǵaw, bul baǵdarda zárúr ilajlardı kóriw áhmiyetli.
Oliy Majlis Nızamshılıq palatasındaǵı Ekologiyalıq partiya frakciyasınıń búgingi májilisinde “Xalıqtı shawqımnıń zıyanlı tásirinen qorǵaw haqqında”ǵı nızam joybarı ekinshi oqıwda qızǵın dodalandı.
Nızam joybarı menen xalıqtı shawqımnan qorǵaw procesi tártipke salınbaqta. Jáhán Densawlıqtı saqlaw shólkeminiń usınıslarına bola, insannıń dem alıw waqtı 8 saat bolıwı kerek. Sonnan kelip shıǵıp, túngi waqıt – 23:00 den 07:00 ge shekemgi waqıt aralıǵında, sonday-aq, dem alıs hám bayram kúnleri saat 22:00 den 09:00 ge shekemgi waqıt aralıǵında puqaralardıń tınıshlıǵın buzǵanı ushın hákimshilik juwapkershilik belgilenbekte.
Qurılıs-montajlaw jumıslarına jumıs kúnleri saat 9:00 den 18:00 ge shekem ruqsat beriw názerde tutılmaqta. Búgingi kúnde joqarı dawıslı motocikllerden paydalanıw, ásirese, túngi waqıtlarda jarıs oynaw jaǵdayları artıp barmaqta. Transport qurallarınıń bunday artıqsha shawqımı ushın da juwapkershilik belgilenbekte. Bunıń ushın Ishki isler uyımlarına tiyisli ilaj kóriw boyınsha wákillikler berilmekte.
Shawqımnan zıyan kórgen jaǵdayda sud tártibinde kompensaciya óndiriw tártibi belgilenbekte. Sonday-aq, hákimshilik juwapkershilik muǵdarın arttırıw máselesi de názerde tutılǵan.
Bul tártipler milliy bayramlar, ǵalabalıq sport hám mádeniy ilajlar, sonday-aq, diniy úrp-ádetler hám máresimlerdi orınlaw nátiyjesinde payda bolatuǵın shawqımǵa qollanılmaydı.
Dodalawlarda deputatlar shawqım tek dem alıs waqtında emes, kúndiz – jumıs waqtında da tásir etiwi múmkin ekenligin aytıp, bunda qanday tártipte ilajlar kóriliwi múmkin ekenligi menen qızıqsındı. Bunnan tısqarı, toyxanalardan shıǵatuǵın bálent shawqımlar máselesine de toqtap ótildi.
Qızǵın soraw-juwaplar dawamında deputatlar tárepinen kóterilgen máselelerge juwaplar berildi.

Muhtarama Komilova, ÓzA