Ózbekstan Respublikası bilimlendiriw shólkemlerine qabıllaw boyınsha Mámleketlik komissiyasınıń bayanlamasına muwapıq, 2025-2026-oqıw jılı ushın bakalavriat tálim baǵdarlarında vakant qalǵan orınlarǵa qosımsha qabıllaw ámelge asırıladı.

Oǵan bola, 2025-jılǵı kiriw imtixanlarında 56,7 ball hám onnan joqarı nátiyje kórsetken, biraq studentlikke usınıs etilmegen, sonıń ishinde, dizimnen ótiwdiń ekinshi basqıshında joqarı bilimlendiriw shólkemi hám bakalavriat tálim baǵdarların tańlamaǵan abiturientlerge tómendegi imkaniyatlar jaratıladı:
– Mámleketlik joqarı bilimlendiriw shólkemlerinde qalǵan vakant bakalavriat tálim baǵdarlarına tańlawda qatnasıw ushın 2025-jıl 25-sentyabrden 3-oktyabrge shekem (sol kúni de) my.uzbmb.uz saytı arqalı onlayn dizimnen ótiw imkaniyatı jaratıladı;
– Dizimnen ótken abiturientler toplaǵan balları izbe-izligine qatań ámel etken halda vakant orınlarǵa bazalıq tólemli-kontrakt tiykarında studentlikke usınıs etiledi;
– Dizimnen ótiw procesinde pánler kompleksi sáykes bolǵan bakalavriat baǵdarın tańlaw imkaniyatı beriledi;
– Tańlaw nátiyjeleri boyınsha protokollar 2025-jıl 8-oktyabrge shekem basıp shıǵarılıp, tiyisli joqarı bilimlendiriw shólkemlerine studentlikke qabıllaw boyınsha hújjetlerdi rásmiylestiriw ushın jetkeriledi.
Ulıwma qabıllaw parametrlerinde vakant orınlar, qalǵan bakalavriat tálim baǵdarları boyınsha maǵlıwmatlar Bilim hám mamanlıqlardı bahalaw agentliginiń rásmiy veb-saytında járiyalanadı.
Qosımsha qabıllaw bilim alıw niyetinde bolǵan, biraq tiykarǵı qabıllawda áwmeti kelmegen abiturientler ushın ekinshi imkaniyat bolıp esaplanadı. Sonday-aq, mámleket tárepinen jaratılıp atırǵan bul sharayatlar jaslarǵa bilim alıw, óz jolın tabıw hám keleshekke isenim menen qaraw imkaniyatın beredi.

Dildora DWSMATOVA.
ÓzA