Usı jıldıń 23-25-sentyabr kúnleri “Ózekspooray” milliy kórgizbeler kompleksinde “Plastmassa hám polimerler sanaatı – Plastex Uzbekistan 2025” 15-yubiley xalıqaralıq kórgizbesi bolıp ótedi.

“Iteca Exhibitions” xalıqaralıq kompaniyası hám onıń sherigi “ICA Eurasia Group” tárepinen shólkemlestirilip atırǵan ilajda Ózbekstan, Germaniya, Hindstan, Iran, Qıtay, Koreya Respublikası, Latviya, Rossiya, Túrkmenstan, Túrkiyadan 250 den aslam kompaniya hám brendler qatnasadı.
Bizge belgili, “Plastex Uzbekistan” birinshi márte 2010-jılı ótkerilgen bolıp, sonnan berli ol plastmassa hám polimer sanaatı qánigeleri ushın áhmiyetli ushırasıw maydanına aylandı. Ótken 15 jıl dawamında bul kórgizbe 20 mámleketten mıńnan aslam kompaniya hám brendlerdi birlestirdi. 30 mıńnan aslam qánigeler hám isbilermenler keldi. Bıyılǵı jılı da ilajǵa iri islep shıǵarıwshılar, tarawdıń jetekshi kompaniyaları hám xalıqaralıq brendler tartılmaqta.
Plastikalıq hám polimer ónimler búgingi ekonomika hám kúndelikli turmıstıń ajıralmas bólegine aylanǵanı sır emes. Sonlıqtan, “Plastex Uzbekistan” tek ǵana zamanagóy texnologiyalar hám jańa qollanbalar kórgizbesi emes, al óndiris quwatlıqların modernizaciyalaw ushın ámeliy platforma sıpatında da xızmet etedi.
Bıyılǵı kórgizbeniń jáne bir jańalıǵı sonda, ol 4P Central Asia formatında ótkeriledi. Bul format plastmassa, neft-ximiya, qadaqlaw hám poligrafiya tarawların birlestirip, óndiristiń barlıq basqıshların hám túrli tarmaqlar arasındaǵı baylanıstı anıq kórsetedi.
Kórgizbe pavilonlarında polimerler, neft-ximiya ónimleri, innovaciyalıq qosımshalar, óndiris liniyaları, robototexnika hám avtomatlastırıw sistemaları, sonday-aq, tayar plastikalıq ónimler kórsetiledi.

N. Ziyodullaeva, ÓzA