“Associated Press of Pakistan” (APP) málimleme agentligi Ózbekstan Respublikası Taw-kán sanaatı hám geologiya ministrliginde Pakistan Islam Respublikası Bas ministriniń sanaat hám óndiris boyınsha arnawlı járdemshisi Xorun Axtar basshılıǵındaǵı delegaciya wákilleri menen ótken ushırasıwın sáwlelendirdi.

Sóylesiw dawamında taw-kán hám mineral resurslar boyınsha sheriklik imkaniyatı dodalandı. Atap ótiliwinshe, Pakistannıń bay, ráńbáreń paydalı qazılmaları hám Ózbekstannıń taw-kán tarawındaǵı tájiriybesin esapqa alǵan halda, eki mámleket usı baǵdarda birge islesiwi ushın úlken potencial bar.
Ilajda ministrdiń birinshi orınbasarı Feruza Hamidova, departament, basqarma baslıqları, Pakistan tárepinen húkimet delegaciyası qatnastı.
Sóylesiw waqtında óz-ara baylanıslar izbe-iz rawajlanıp atırǵanı atap ótilip, kán-geologiya tarawında bahalı hám reńli metallar, sonday-aq, sanaat ushın áhmiyetli minerallar baǵdarında birgeliktegi joybarlardı ámelge asırıw imkaniyatı haqqında pikir alısıldı. Ámeliy processti jáne de jedellestiriw maqsetinde turaqlı túrde ministrler ushırasıwların ótkeriwge kelisip alındı.
Sol kúni miymanlar texnoparkke barıp, elimizde islep shıǵarılıp atırǵan hár qıylı turmıslıq, tiykarınan elektron ónimlerdiń islep shıǵarılıwın kózden ótkerdi.
Pakistanlılar birgelikte zamanagóy gaz hám elektr esaplaǵısh, quyash suw ısıtqıshın islep shıǵarıwǵa ayrıqsha qızıǵıwshılıq bildirdi.

Muharrama Pirmatova, ÓzA