Húrmetli festival hám forum qatnasıwshıları!
Húrmetli miymanlar!
Xanımlar hám mırzalar!
Siz, ázizlerdi janajan Watanımızdıń tariyxıy qalalarınan biri – áyyemgi Qoqandqa jáne úlken bayram nápesin alıp kelgen Xalıqaralıq ónermentshilik festivalı hám Xalıqaralıq gúlalshılıq forumınıń ashılıwı menen shın kewlimnen qızǵın qutlıqlayman.
Xalıq ámeliy kórkem ónerin, onıń rawajlanıw tariyxı, mektebi hám dástúrlerin úyreniw hám úgit-násiyatlawǵa qaratılǵan bul ánjumanımızda dúnyanıń 70 ten aslam mámleketinen 300 ge shamalas sheber ónermentler, xalıqaralıq shólkemler, mádeniy hám ilimiy jámiyetshilik wákilleriniń qatnasıp atırǵanı onıń xalıqaralıq abırayı hám dárejesi barǵan sayın artıp atırǵanınan dárek beredi.
Elimizdiń kóp ásirler dawamında qáliplesken bay mádeniy miyrası, milliy dástúr hám qádiriyatlarınıń ajıralmas bólegi bolǵan, ótmish hám keleshek arasında misli ruwxıy kópir wazıypasın atqarıp kiyatırǵan ónermentshilik tarawınıń rawajlanıwına elimizde úlken itibar berilmekte. Nátiyjede bul baǵdar ekonomikamızdıń áhmiyetli tarmaqlarınan birine aylanıp barmaqta. Bunıń tastıyıǵın ónermentler, qolı gúl ustalar, dizayner hám jas dóretiwshiler ushın úlken imkaniyatlar jaratılıp atırǵanı, olardıń ónimlerin dúnya bazarına alıp shıǵıw hám milliy brend sıpatında tanıtıw jolında keń kólemli jumıslardıń ámelge asırılıp atırǵanında kóriw múmkin.
Ásirese, bul taraw rawajlanǵan qala hám rayonlarda 11 ónermentshilikti rawajlandırıw orayları shólkemlestirilgeni, jıllıq ónim islep shıǵarıw kólemi 1 trillion 500 milliard sumnan artqanı hám olardı dúnyanıń túrli mámleketlerine eksport etiw keńeyip atırǵanın atap ótiw zárúr.
Ámeliy kórkem óner túrlerin qayta tiklewge qaratılǵan izbe-iz háreketlerimiz nátiyjesinde olardıń sanı 43 ke jetti, sońǵı úsh jılda bolsa túrli baǵdarlarda miynet etip atırǵan 31 mıń 500 sheber ustalarımız bolsa “Ónerment” associaciyası aǵzalıǵına birinshi márte qabıl etildi.
Tek ǵana “Ustaz hám shákirt” dástúri tiykarında 118 mıń jas, sonıń ishinde, kem támiyinlengen, waqtınsha jumıssız, mayıplıǵı bolǵan puqaralardıń bántligi támiyinlengeni tarawdıń rawajlanıwı sociallıq máselelerdi sheshiwde de úlken áhmiyetke iye bolıp atırǵanın kórsetedi.
Elimizde óz kásibine bárqulla úlken mehir hám sadıqlıq penen miynet etip kiyatırǵan ónermentlerdiń mashaqatlı miynetin xoshametlewge de ayrıqsha itibar berilmekte, kóplegen taraw wákilleri mámleketimizdiń joqarı ataqları, orden hám medalları menen sıylıqlanbaqta.
Húrmetli ánjuman qatnasıwshıları!
Festival sheńberindegi xalıqaralıq konferenciyalar, kórgizbe hám yarmarkalar, milliy lipaslar kórgizbeleri hám ushırasıwlar, Rishton rayonında ótkeriletuǵın Xalıqaralıq gúlalshılıq forumı ózine tán dóretiwshilik sóylesiwler maydanı, jas ónermentler ushın sheberlik sabaqları bolıp xızmet etedi, álbette.
Hámmemizge belgili, Dúnya ónermentler keńesiniń qararı menen Buxara, Qoqand hám Marǵulan sıyaqlı eski qalalarımız “Dúnya ónermentler qalası” degen joqarı statusqa iye bolǵan edi. Bıyıl olardıń qatarına Rishtan hám Shahrixon qalaları da qosılmaqta.
Usı kúnlerde TÚRKSOY Bas sekretariatı tárepinen Qoqand qalasına jáne bir húrmetli atama – “Túrkiy dúnyanıń ónermentleri qalası” degen status berildi. Biz bulardıń barlıǵın mámleketimizde xalıq ámeliy kórkem ónerin rawajlandırıwǵa qaratılǵan jumıslarımızdıń xalıqaralıq kólemdegi jáne bir tán alınıwı sıpatında qabıl etemiz.
Ázelden óziniń gózzal dástúrleri, sonıń ishinde, ónermentshilik mektepleri, sheberlik boyınsha teńsiz ustaları menen dańqqa erisken biytákirar Ferǵana jerinde ótip atırǵan bul kórkem óner bayramları mádeniy turmısımızda tereń iz qaldıratuǵın, doslıq hám awızbirshilik baylanısların jáne de bekkemleytuǵın, jas áwlad ushın keń imkaniyatlar ashatuǵın umıtılmas waqıya bolıp qaladı, dep isenemen.
Bársheńizge bekkem densawlıq, jańa dóretiwshilik jetiskenlikler, festival hám forum jumısına tabıslar tileymen.

Shavkat MIRZIYoEV,
Ózbekiston Respublikasi Prezidenti