Qaraqalpaqstan Respublikası Ádillik ministrligi hám Ózbekstan Mayıplar jámiyetiniń Qaraqalpaqstan bólimi tárepinen paytaxtımızda elimiz boylap sociallıq qorǵawǵa mútáj shaxslardı qollap-quwatlaw hám olardıń huqıqıy sawatlılıǵın arttırıwǵa qaratılǵan «Sociallıq qorǵawǵa mútáj xalıq qatlamlarına huqıqıy járdem» akciyası ótkerildi.

Akciya sheńberinde mayıplıǵı bolǵan balalar arasında «Insan qádiri mámleket qorǵawında» atamasında reńli súwretler tańlawı, mayıplıǵı bolǵan shaxslar tárepinen tayarlanǵan qol óneri buyımları yarmarkası shólkemlestirildi.
Sonday-aq, akciya dawamında Nókis qalası Gúlzar MPJda Qaraqalpaqstan Respublikası Ádillik ministrliginiń insan huqıqların qorǵaw sektorınıń bas másláhátshisi T.Maxamatdinov hám Sociallıq qorǵaw milliy agentligi Qaraqalpaqstan Respublikası basqarmasınıń múrájatlar menen islesiw bóliminiń baslıǵı I.Ruzimbaevlar tárepinen sociallıq qorǵawǵa mútáj xalıq qatlamı ushın kóshpeli qabıllaw ótkerildi.
-Kóshpeli qabıllawda 20 ǵa shamalas puqaralar qatnasıp, 5 puqaranıń múrájatı ministrlik tárepinen úyrenilip shıǵıw ushın qabıllanıp alındı,-deydi usı ministrliktiń huqıqıy málimleme sektorı baslıǵı Nuriya Berdiniyazova.-Endi bul múrájatlar tiyisli qánigeler tárepinen tereń úyrenilip, olarǵa huqıqıy járdemler kórsetiledi.
«Sociallıq qorǵawǵa mútáj xalıq qatlamlarına huqıqıy járdem» akciyası házirgi kúnleri pútkil respublikamız boylap dawam ettirilmekte.

Qaraqalpaqstan xabar agentligi