Qızlar hám kelinlerdiń ayaq kiyimi, sheber xalıq ustaları – etikshiler tárepinen jaratılǵan búgingi kúnde tabılmas dóretpe – zerli gewish I.V.Savickiy atındaǵı Qaraqalpaqstan mámleketlik kórkem óner muzeyi fondında saqlanıp kelinbekte.

Bul eksponat 1982-jılı Qanlıkól rayonında jasawshı Xaljan Marxabaeva tárepinen muzeyge tapsırılǵan. Gewishler baspaq terisin arnawlı túrde qayta islew arqalı tayarlanǵan: jumsaq bolıwı ushın onı bir neshe kún qatıqqa salıp qoyǵan degen maǵlwmatlar bar. Tájiriybeli ustalar ayaq kiyimdi aǵash qálipte qol miyneti menen arnawlı buyırtpa tiykarında tikken. Gewishti názik naǵıslar menen bezewde jińishke gúmis sım hám metall naǵıs oyıwshılıq usılları paydalanılǵan. Ósimlik tárizli naǵıslar menen ústi hám artqı tárepleri qaplanıp, ápiwayı garderob buyımınan haqıyqıy dekorativlik-ámeliy kórkem óner shıǵarmasına aylandırılǵan. Qaraqalpaq etikshileriniń sheberligi, názik talǵamı hám uqıplılıǵınıń belgisi bolǵan bunday ayaq kiyimler xalıq arasında «zerli gewish» dep atalǵan.
Bul jaqsı saqlanǵan bir jup gewish muzeydiń ápiwayı eksponatı emes, al, qaraqalpaq xalqınıń bay kórkem óneri hám estetikalıq talǵamınan dárek beretuǵın biybaha miyras bolıp tabıladı.

Qaraqalpaqstan xabar agentligi