Mámleketimiz basshısınıń 2025-jıl 8-sentyabrdegi «Almalıq mámleketlik texnika institutın shólkemlestiriw haqqında»ǵı qararı menen Tashkent mámleketlik texnika universiteti Almalıq filialı negizinde Almalıq mámleketlik texnika universiteti shólkemlestirilmekte.

Usı filialda oqıp atırǵan barlıq studentler oqıwın institutta dawam ettiredi hám 2025-2026-oqıw jılınan pitkeriwshi kurs studentlerine belgilengen tártipte diplom beriledi.
Institutta geologiya, metallurgiya hám texnikaǵa qánigelesken aldınǵı injenerlik mektebi (“GeoMetTex”) shólkemlestiriledi. Bul mektepte bilim alıw ushın akademiyalıq kórsetkishleri joqarı studentler tańlaw tiykarında tańlap alınadı hám ámeliyatqa baǵdarlanǵan arnawlı bilimlendiriw baǵdarlamaları tiykarında oqıtıladı.
“GeoMetTex” aldınǵı injenerlik mektebi baǵdarına sáykes sanaat birge islesiwshileri belgilenip, olardı texnikalıq hám texnologiyalıq jaqtan támiyinlew ushın zamanagóy laboratoriyalar shólkemlestiriledi.
«Tashkent qalasında N.E.Bauman atındaǵı Moskva mámleketlik texnika universitetiniń filialın shólkemlestiriw haqqında»ǵı Prezident qararı tiykarında bolsa Tashkent qalasında N.E.Bauman atındaǵı Moskva mámleketlik texnika universiteti filialı shólkemlestiriledi.
Filialda injenerlik tarawında innovaciyalıq qatnaslardı qollay alatuǵın, tereń ilimiy-texnikalıq bilimlerge iye bolǵan joqarı mamanlıqtaǵı kadrlar tayarlanadı. Injenerlik tarawında fundamental hám ámeliy ilimiy-izertlewler ótkeriledi. Filialda bilimlendiriw jumısı 2026-2027-oqıw jılınan baslanadı.
Studentlerdi oqıwǵa qabıllaw mámleketlik grant hám tólemli-kontrakt tiykarında ámelge asırıladı. 2025-2026-oqıw jılınan Moskva mámleketlik texnika universiteti hám Tashkent mámleketlik texnika universiteti menen birgelikte magistratura qánigelikleri boyınsha birgeliktegi bilimlendiriw baǵdarlamaları tiykarında kadrlar tayarlaw jolǵa qoyıladı.
Pitkeriwshilerge Ózbekstanda joqarı maǵlıwmat haqqındaǵı hújjet sıpatında tán alınatuǵın diplom beriledi.

N.Abduraimova,
ÓzA