AQSh Kongressiniń eń iri hám áhmiyetli ofis komplekslerinen biri – “Rayburn House Office Building” imaratında “Jańa Ózbekstan: Shavkat Mirziyoev jolı” kitabınıń prezentaciyası ótkerildi.

Ilajdıń usı komplekste shólkemlestirilgeni bul prezentaciyaǵa bolǵan joqarı itibar hám siyasiy áhmiyetti jáne de arttırdı. Sonıń menen birge, Ózbekstan hám Amerika Qurama Shtatları arasındaǵı sóylesiwdiń eń joqarı institucionallıq dárejede bekkemlenip atırǵanınan dárek bermekte.
Prezentaciyada Amerika tárepinen 70 ten aslam miymanlar – Mámleketlik departament, Kongress xızmetkerleri, jetekshi tallaw oraylarınıń basshıları, biznes, ilim, mádeniyat hám ǵalaba xabar qurallarınıń wákilleri qatnastı.
Rásmiy bólimdi Ózbekstannıń AQShtaǵı Elshisi Furqat Siddiqov hám Ózbekstan Respublikası Oliy Majlisi Senatı Baslıǵınıń birinshi orınbasarı Sodiq Safoev ashıp berdi.
Olar ózleriniń shıǵıp sóylewlerinde Prezident Sh.M.Mirziyoevtiń basshılıǵında mámleketimizde sociallıq-ekonomikalıq hám demokratiyalıq reformalardıń jańa dáwiri ámelge asırılıp atırǵanın atap ótip, bul kitap usı rawajlanıw jolın ózinde analitikalıq sáwlelendirgenin atap ótti.
Sonday-aq, Prezident janındaǵı Qáwipsizlik keńesi xatkeriniń birinshi orınbasarı, Strategiyalıq hám regionlararalıq izertlewler institutınıń direktorı Eldor Aripov hám senator Husan Ermatov shıǵıp sóylep, házirgi kúndegi reformalar sistemalı hám keń kólemli xarakterge iye ekenin, olar mámlekettiń pútkilley jańa kelbetin qáliplestirip atırǵanın atap ótti.
Ilaj qatnasıwshılarına kitaptıń mazmunı haqqında tolıq maǵlıwmat berildi. Kitap avtorı – Ózbekstan Respublikası Oliy Majlisi Senatınıń aǵzası, Ózbekstan Kásiplik awqamları Federaciyasınıń baslıǵı Qudratilla Rafiqov haqqında sırt elli miymanlarǵa maǵlıwmat berildi. Kitapta Prezident Shavkat Mirziyoev tárepinen keyingi segiz jılda ámelge asırılǵan reformalardıń tiykarǵı baǵdarları hám basqıshları sáwlelendirilgen bolıp, olardıń mámlekettiń ekonomikalıq, sociallıq hám siyasiy rawajlanıwına tásiri tallanǵan.
Sonday-aq, shıǵıp sóylegen AQShtıń jetekshi akademiyalıq almasıw mákemelerinen biri esaplanǵan “American Councils” prezidenti Liza CHoat óziniń shıǵıp sóylegen sózinde Prezident Sh.M.Mirziyoev siyasatınıń tiykarǵı principi bilimlendiriw hám jaslardı qollap-quwatlaw ekenin atap ótti. Onıń sózlerine bola, sońǵı jılları bul tarawda misli kórilmegen institucionallıq hám nızamshılıq sistemasında ózgerisler ámelge asırıldı. Sonıń menen birge, Ózbekstan hám AQSh arasında xalıqaralıq akademiyalıq almasıw sapa jaǵınan jańa basqıshqa shıqqanın aytıp ótti.
“Caspian Policy Center” analitikalıq orayınıń atqarıwshı direktorı Efgan Nifti óziniń shıǵıp sóylegen sózinde kitap Ózbekstandaǵı reformalardıń mánisin tereńirek túsiniw imkaniyatın berip atırǵanın atap ótti.
Ol Ózbekstan Basshısınıń demokratiyalıq institutlardı bekkemlew hám jedel sırtqı siyasat júrgiziwge qaratılǵan háreketleri mámlekettiń xalıqaralıq abırayın arttırıw, regionallıq birge islesiw hám jaqın qońsıshılıq qatnasıqların rawajlandırıwǵa xızmet etip atırǵanın atap ótti.
“Amerika – Ózbekstan sawda palatası” atqarıwshı direktorı Elena Son óziniń shıǵıp sóylegen sózinde Ózbekstan Prezidentiniń basshılıǵında mámleket ekonomikasında ámelge asırılǵan keń kólemli ózgerislerdi ayrıqsha atap ótti. “Biznes ortalıǵın liberallastırıw, investiciyalardı tartıw, erkin ekonomikalıq zonalardı rawajlandırıw, joqarı qunlı ónimlerdiń eksportın keńeytiw sıyaqlı háreketler milliy ekonomikaǵa jańa nápes baǵıshladı hám onıń dúnya bazarına integraciyalasıwın jedellestirdi”, – dep atap ótti.
Bul bolsa Amerika kompaniyaları ushın jańa imkaniyatlar esigin ashıp atırǵanı, atap aytqanda, energetika, transport, awıl xojalıǵı, málimleme texnologiyaları hám aviaciya tarawlarındaǵı joybarlarǵa qızıǵıwshılıq artıp atırǵanın ayrıqsha atap ótti.
“Boeing” aviaqurılıs korporaciyasınıń satıwlar boyınsha direktorı Mario Ebkim Ózbekstan menen birge islesiwdiń strategiyalıq áhmiyetine itibar qarattı.
Ol Prezident tárepinen transport infrastrukturasın modernizaciyalaw hám aviaciya tarawın rawajlandırıwǵa qaratılǵan háreketler jańa joybarlardı ámelge asırıw, aviaparkti jańalaw hám zamanagóy texnologiyalardı engiziw ushın úlken imkaniyatlar jaratıp atırǵanın atap ótti.
«Diplomatic Watch» analitikalıq jurnalınıń atqarıwshı direktorı Vinsent Gotevbe Prezident Sh.M.Mirziyoev tárepinen jaslar siyasatına berilip atırǵan tiykarǵı áhmiyetti joqarı bahaladı. Onıń pikirinshe, Ózbekstanda jaslar mámlekettiń strategiyalıq rezervi sıpatında kórilmekte hám bul tarawda ámelge asırılıp atırǵan reformalar mámlekettiń turaqlı sociallıq-ekonomikalıq rawajlanıwına isenim menen qarawǵa tiykar jaratadı.
Prezentaciya sheńberinde AQSh rásmiyleri, ekspertler hám biznes wákilleriniń qatnasıwında mazmunlı sóylesiw de bolıp ótti. Olar Ózbekstan Prezidenti Sh.M.Mirziyoevtiń basshılıǵında ámelge asırılıp atırǵan reformalardıń áhmiyeti hám eki tárepleme qatnasıqlardı jáne de tereńlestiriw perspektivaları boyınsha pikir alıstı.
Kitaptıń elektron nusqaları Kongress, tallaw orayları hám Vashingtondaǵı siyasiy qarar qabıl etiw processlerine tásir kórsete alatuǵın toparlarǵa keńnen tarqatıldı.
Ilaj, sonday-aq, Ózbekstannıń AQShtaǵı unamlı imidjin jáne de bekkemlew hám xalıqlarımız arasındaǵı uzaq múddetli baylanıslardı rawajlandırıwǵa xızmet etetuǵın nátiyjeli ǵalaba diplomatiya úlgisi sıpatında bahalandı.
AQSh Kongressi imaratında ótkerilgen “Jańa Ózbekstan: Shavkat Mirziyoev jolı” kitabınıń prezentaciyası mámleketimiz Basshısınıń baslamaları menen ámelge asırılıp atırǵan reformalardı dodalaw hám joqarı bahalaw ushın áhmiyetli sóylesiw maydanına aylandı.

ÓzA