Ájiniyaz atındaǵı Nókis mámleketlik pedagogikalıq institutında ÓzLiDeP Qaraqalpaqstan Respublikası Keńesiniń baslaması menen Oliy Majlis Nızamshılıq palatası janındaǵı Jaslar parlamenti aǵzaları hám student-jaslardıń qatnasıwında ilaj bolıp ótti. Ilaj Ózbekstan Respublikası Prezidentiniń Muǵallimler hám ustazlar kúni múnásibeti menen ótkerilgen májilisinde belgilengen wazıypalardan kelip shıǵıp shólkemlestirildi.

Ilajdan gózlengen tiykarǵı maqset – bilimlendiriw tarawında ámelge asırılıp atırǵan reformalardı keń jámiyetshilikke, ásirese, jaslar hám pedagoglar qatlamına túsindiriw, olardıń pikir hám usınısların úyreniwden ibarat boldı.
Ilaj dawamında shıǵıp sóylegenler tárepinen mámleket basshısınıń baslaması menen bilimlendiriw sistemasın hár tárepleme rawajlandırıw boyınsha ámelge asırılıp atırǵan reformalar keń túrde talqılandı. Atap aytqanda, mektepke shekemgi bilimlendiriw mákemeleriniń sanı hám qamtıp alıwınıń artıwı, ulıwma bilim beriw mektepleri infrastrukturasınıń jaqsılanıwı, kásiplik hám joqarı bilimlendiriw sistemasında engizilip atırǵan jańalıqlar, qánige tayarlawdaǵı jańa qatnaslar ayrıqsha atap ótildi.
Sonday-aq, bilimlendiriw sistemasındaǵı tiykarǵı wazıypalar qatarında muǵallim hám ustazlardıń sociallıq qorǵalıwın kúsheytiw, olardıń miynet sharayatın jaqsılaw, mamanlıǵın arttırıw boyınsha kórilip atırǵan ilajlar da ayrıqsha atap ótildi.
Jaslar parlamenti aǵzaları ilajda belsene qatnasıp, jámiyette jaslardıń bilimli hám kásip iyesi bolıp kamalǵa keliwi jolında ámelge asırılıp atırǵan ilajlar boyınsha óz pikir-usınısların bildirdi. Bilimlendiriwdegi jańa baslamalar, sonıń ishinde, “Jańa áwlad” baqshaları, dual bilimlendiriw sisteması, xalıqaralıq kásiplik sertifikatlaw, texnikumlarda joqarı texnologiyalı ustaxanalardıń jaratılıwı sıyaqlı joybarlar jaslar tárepinen unamlı qabıl etilmekte.
Nókis mámleketlik pedagogikalıq institutı studentleri de óz sózlerinde bilimlendiriw sapasınıń artıwı, ámeliy bilimlerge bolǵan itibardıń kúsheyiwi olardıń keleshekte básekige shıdamlı qánige sıpatında qáliplesiwinde áhmiyetli faktor bolıp atırǵanın atap ótti.

Ilaj juwmaǵında bilimlendiriw tarawında ámelge asırılıp atırǵan reformalardıń mazmun-mánisin keń jámiyetshilikke jetkeriw, jaslardıń mámleketlik siyasattıń belsendi qatnasıwshısına aylanıwına xızmet etetuǵın baslamalardı qollap-quwatlaw zárúrligi ayrıqsha atap ótildi.

Qaraqalpaqstan xabar agentligi