Nókis mámleketlik texnika universitetinde kommerciyalastırıw hám startap joybarlardı ámelge asırıw boyınsha xalıqaralıq ekspertler menen ushırasıw bolıp ótti.

Universitet rektorı Batırbek Kayıpbergenov, Jáhán rawajlanıw banki konsultantı, venchur arxitektorı Sergey Makarov hám texnologiyalıq broker, innovaciyalıq ekosistema arxitektorı Erbolat Orazbek ulı menen sáwbetlesti.
Universitettiń oqıw isleri boyınsha prorektorı Rashid Óteniyazov, ilimiy isler hám innovaciyalar boyınsha prorektorı Maxkam Artikbaev, Xalıqaralıq birge islesiw bólimi baslıǵı Timur Palvanov, bólim qánigesi Dilbar Djumaniyazovalar qatnasqan ushırasıw ashıq sáwbet túrinde bolıp ótti.
Onda ilim hám biznes arasında tıǵız baylanıstı jolǵa qoyıw, hár qıylı baǵdarlarda startaplardı jaratıw, rawajlandırıw hám ámelge asırıwdıń áhmiyeti miymanlar menen keń túrde dodalandı. Ilajda innovaciyalıq ideyalardı qollap-quwatlaw mexanizmleri, ónimlerdi bazarǵa alıp shıǵıw jolları, joqarı bilimlendiriw mákemeleri, biznes hám venchur strukturaları arasındaǵı birge islesiw imkaniyatları boyınsha pikir alısıldı.

Qaraqalpaqstan xabar agentligi