«Ustaz atańday ullı» deydi dana xalqımız. Sonlıqtan mámleketimizde ustazlarǵa itibar hám húrmet ayrıqsha. Ásirese, sońǵı jılları elimizde barlıq tarawlar sıyaqlı bilimlendiriw tarawına da ayrıqsha itibar qaratılıp, bul baǵdarda iri reformalar ámelge asırıldı.

Muǵallimlerdiń jámiyettegi statusı belgilenip, olardı hár tárepleme qollap-quwatlaw boyınsha kóplegen unamlı isler ámelge asırıldı. Bilimlendiriw shólkemleriniń materiallıq-texnikalıq bazası bekkemlenip, aymaqlarda jańadan mektep hám balalar baqshaları boy tiklep, olarda balalarımızdıń bilim alıwı ushın barlıq qolaylı sharayatlar jaratıp berildi.
1-oktyabr – «Muǵallimler hám ustazlar kúni» múnásibeti menen respublikamızdıń barlıq aymaqlarında bolǵanı sıyaqlı Shımbay rayonında bayram ilajı bolıp ótti.
Ilajda rayon hákiminiń orınbasarı A.Ótemisov hám basqalar shıǵıp sóylep, mektepke shekemgi hám professional bilimlendiriw sistemasında jumıs alıp barıp atırǵan pidayı muǵallim hám ustazlardı bayram menen qızǵın qutlıqlap, bilimlendiriw tarawın rawajlandırıwǵa qaratılǵan mámleketlik baǵdarlamalar hám reformalarǵa toqtap ótti. Ásirese, sońǵı jılları elimizde bilimlendiriw tarawında ámelge asırılıp atırǵan iri ózgeris hám jańalanıwlardı keń túrde atap ótip, Prezidentimiz tárepinen bildirilgen isenimdi aqlaw zárúrligine toqtap ótti.
– Men kóplegen taraw wákillerine ataq, orden hám medallar beremen. Biraq ustazlar sıylıqlanatuǵın kúndi saǵınıp kútemen. Kókiregińizdi bezep turǵan orden-medallar múbárek bolsın. Elimizde joqarı sıylıqlarǵa múnásip pidayı muǵallimler kóbeysin, – degen Prezidentimizdiń sózleri bizlerge ayrıqsha kúsh-quwat baǵıshladı deydi- rayondaǵı 17-sanlı ulıwma orta bilim beriw mektebiniń direktorı Janar Alieva.
Keshede ilaj qatnasıwshıları ushın bayram dasturxanı jayılıp, bilimlendiriw tarawında uzaq jıllar nátiyjeli miynet etken pedagoglar sıylıqlandı hám olarǵa mádeniyat xızmetkerleri tárepinen tayarlanǵan koncert baǵdarlaması qoyıp berildi.

Adilbay Orazov,
Qaraqalpaqstan xabar agentligi sholıwshısı.