Oliy Majlis Nızamshılıq palatasınıń májilisinde Jaslar isleri agentligine jaslardıń bos waqtınan únemli paydalanıw hám olardı kásip-ónerge oqıtıw arqalı bántligin támiyinlewge qaratılǵan ilajlardıń ámelge asırılıwı haqqında parlamentlik soraw jiberildi.

Atap ótilgenindey, búgingi globallasıw processleri, báseki ortalıǵı hám texnologiyalardıń rawajlanıwı jaslardan zaman talabına juwap beretuǵın bilim hám kónlikpege iye bolıwdı talap etpekte. Bul bolsa jaslardıń bos waqtın nátiyjeli hám mazmunlı ótkeriw, olardı zamanagóy kásip-ónerlerge oqıtıw hám bántligin támiyinlew baǵdarında alıp barılıp atırǵan jumıslardı bunnan bılay da kúsheytiwdi, bul baǵdarlarda belgilengen wazıypalardıń orınlanıwına ayrıqsha qatnas jasawdı talap etedi.
Nızamshılıq palatası deputatlarınıń saylaw okruglerindegi ushırasıwları hám aymaqlarda ótkerilgen qadaǵalaw-tallaw ilajları dawamında tarawda ele óz sheshimin kútip atırǵan máseleler bar ekenligi anıqlandı.
Atap aytqanda, ayırım aymaqlarda jaslardıń bos waqıtların mazmunlı shólkemlestiriw maqsetinde ótkerilip kiyatırǵan “Bes baslama olimpiadası”nıń máhállelerdegi úgit-násiyatlawı hám tómengi basqıshları sheńberinde jaslardıń qamtıp alınıwı jeterli dárejede shólkemlestirilmey atırǵanı, máhálle basqıshlarınıń qatnasıwshıların hám jeńimpazların materiallıq hám ruwxıy xoshametlew mexanizmi belgilenbegen.
Sonday-aq, jaslar jetekshileri tárepinen “Jaslar bántligi baǵdarlaması”n máhállede ámelge asırıw boyınsha jaratılǵan imkaniyatlardı máhállelerdegi jaslarǵa jetkeriwde nemquraydılıqqa jol qoyılıp atırǵanı, juwapker ministrlik, uyım hám shólkemler menen integraciya baylanısları tolıq jolǵa qoyılmaǵanı nátiyjesinde mámleket tárepinen berilgen jeńilliklerden jaslar tolıq paydalana almay atırǵan jaǵdaylar baqlanbaqta.
Sonıń menen birge, “Jaslar dápteri” qorına ajıratılǵan qarjılar ayırım rayonlarǵa óz waqtında hám tolıq jetkerip berilmey atırǵanı jáne qarjılardı bólistiriw mexanizmi tolıq támiyinlenbey atırǵanı anıqlanǵan.
Bunnan tısqarı, úyreniwler dawamında jas fermerlerge ajıratılǵan jer maydanlarınıń ónimdarlıǵı, suwǵarılıwı hám infrastrukturanıń bar ekenligi “Jas fermerler” baǵdarlaması sheńberinde jaratılǵan yoshfermer.uz (https://yoshfermer.uz/) platformasında kórsetilgen maǵlıwmatlardan parıqlanatuǵını belgili bolǵan.
Usınday mashqalalardan kelip shıǵıp, parlamentlik sorawda jaslardıń bos waqtın mazmunlı shólkemlestiriw ushın ótkerilgen ilajlar, olardı kásip-ónerge oqıtıw hám jumıs penen támiyinlew boyınsha kórsetkishler, sonday-aq, jergilikli hákimiyat hám jeke menshik sektor menen birge islesiw baylanısları sıyaqlı máseleler qamtıp alındı.

Muhtarama Komilova, ÓzA