Hárbir sanalı insan ózine mektepte tálim-tárbiya bergen dáslepki muǵallimlerin hesh qashan umıtpaydı. Sebebi, olardıń pidayılıq penen islegen xızmetleriniń arqasında, búgingi kúni bizler turmıstan óz ornımızdı tawıp, baxıtlı turmısta jasap atırmız.

Qaraózek rayonındaǵı 32-sanlı ulıwma orta bilim beriw mektebiniń inglis tili páni muǵallimi Gúldariyxa Orazımbetova da usınday miynetkesh hám talapshań ustazlardıń biri bolap tabıladı.
1960-jılı Xojeli rayonında tuwılıp, 13-sanlı orta mektepti tamamlaǵan, ol óziniń qızıǵıwshılıǵına bola 1978-jılı Nókis mámleketlik universitetiniń Romano-german fakultetine oqıwǵa kirip, bul jerde respublikamızǵa belgili pedagoglardan tálim aladı.
Universitette birge oqıǵan kurslası Azat Aytımbetovke turmısqa shıqqan ol, 1983-jıldan 2004-jılǵa shekem Qaraózek rayonındaǵı 23-sanlı ulıwma orta bilim beriw mektebinde dáslep inglis tili páni muǵallimi, sońınan mektep direktorınıń ruwxıylıq hám aǵartıwshılıq isler boyınsha orınbasarı bolıp jemisli jumıs isleydi.
2005-2009-jılları bolsa, 5-sanlı mektepte, keyin 2015-jılǵa shekem Qaraózek ekonomika kolledjinde muǵallim bolıp, ósip kiyatırǵan jas áwladqa inglis tili páninen sabaq beredi.
-2015-jılı sol waqıttaǵı Qarakól awıl puqaralar jıyınına hayal-qızlar másláhátshisi lawazımına tayınlanıp, bul jerde 2019-jılǵa shekem xızmet ettim,-deydi Gúldariyxa Orazımbetova.-Sońınan ózimniń súyikli kásibim bolǵan muǵallimshilikke jáne qayta oralıp, Qaraózektiń eń shetki awıllarınıń biri Nurım túbek elatında jaylasqan 32-sanlı ulıwma orta bilim beriw mektebine jumısqa ornalastım. Mine sonnan berli, usı dárgayda oqıwshılarǵa inglis tili páninen sabaq berip kelmektemen. Kásibim ózime oǵada unaydı. Sonlıqtan da men úyim mektepke 30 km uzaqlıqta bolsa da hesh bir sabaǵımdı úziliske túsirmeymen. Sebebi, meni hár kúni oqıwshılarım úlken úmitler menen kútedi. Sabaqlarda túsinbegenin mennen sorap, ózleriniń bilimlerin tereńlestiredi.
Haqıyqatında, muǵallimshilik kásiplerdiń ishinde eń ullısı bolıw menen birge, mashaqatı, táshwishi kóp jumıs bolıp esaplanadı. Bunı usı tarawda islep kórgen adamlar jaqsı túsinse kerek. Biraq, bul jumısta qıyınshılıq penen birge, quwanısh ta qatar júredi. Eger, pedagog balalarǵa jalıqpastan, tıyanaqlı bilim berse, oqıwshıları ózleriniń tereń bilim hám aqıl-zeyini menen óz ustazın keń jámiyetshilikke tanıtadı.
Gúldariyxa apanıń da usınday bilimli shákirtleri oǵada kóp. Olardıń ayırımları búgingi kúni 32-sanlı mektepte oqıp atırǵan bolsa, kópshiligi xalıq xojalıǵınıń hár qıylı tarawlarında jemisli xızmet etpekte.
Bıyılǵı bayram Gúldariyxa Orazımbetova ushın oǵada quwanıshlı keldi. Sebebi ol, 1-oktyabr-Muǵallimler hám ustazlar kúni múnásibeti menen Ózbekstan Respublikası Prezidentiniń Pármanı tiykarında elimizde tálim-tárbiya tarawın xalıqaralıq standartlar tiykarında rawajlandırıw, bul baǵdardaǵı reformalardıń nátiyjeliligin arttırıw, oqıw procesine aldınǵı tájiriybeler, innovaciyalıq pedagogikalıq texnologiyalardı keńnen engiziw baǵdarındaǵı múnásip úlesi, oqıwshı jaslarǵa zamanagóy bilim hám kásip-ónerlerdi úyretiw, olardıń intellektuallıq potencialın arttırıw, joqarı mamanlıqtaǵı kadrlardı tayarlaw, salamat hám bárkamal áwladtı kamalǵa keltiriw, perzentlerimizdi ana Watanǵa súyispenshilik hám sadıqlıq, milliy hám ulıwmainsanıylıq qádiriyatlarǵa húrmet ruwxında tárbiyalaw jolındaǵı úlken xızmetleri, jámiyetlik turmısta belsene qatnasıp atırǵanı ushın «Mehnat shuhrati» ordeni menen sıylıqlandı.
-Bul úlken sıylıq penen sıylıqlanıwım maǵan ayrıqsha quwanısh baǵıshladı,-deydi Gúldariyxa Orazımbetova.-Elimiz pedagoglarına kórsetip atırǵan atalarsha ǵamqorlıǵı hám qollap-quwatlawı ushın húrmetli Prezidentimizge úlken raxmet aytaman. Elimiz basshısınıń bildirgen bul joqarı isenimi meni jáne jigerlendirip, alǵa qaray umtıldıra beredi.
Gúldariyxa Orazımbetova mektepte oqıwshılarǵa inglis tilinen sabaq beriw menen birge, kórkem dóretiwshilikke de qızıǵadı. Qolı bos waqıtları dúnyaǵa belgili jazıwshı hám shayırlardıń dóretpelerin oqıp, ózi de ilham-yosh kelgen waqıtları tuwılǵan jer, ana-Watan, jaslar tárbiyası hám muhabbat haqqında qosıqlar jazadı. Onıń búgingi kúnge shekem “Kewlimde árman”, “Jaslıǵım bar kewlimde” poeziyalıq toplamları, “Qaraózek rayonı Ishki isler bólimi tariyxınan” atlı prozalıq dóretpesi baspadan shıǵıp, óz oqıwshıların taptı, desek orınlı boladı.
Kóksin “Shuhrat” medalı hám “Mehnat shuhrati” ordeni bezegen qaraózekli muǵallimniń quwanıshında shek joq. Ol jáne jumısqa qaray asıqpaqta. Sebebi, onı ádiwli oqıwshıları, qádirdan kásiplesleri intizarlıq penen kútpekte.

Adilbay Orazov,
Qaraqalpaqstan xabar agentligi sholıwshısı