Prezident Shavkat Mirziyoev 16-sentyabr kúni CHust rayonındaǵı «Megaton» kárxanasınıń gaz-beton blogin islep shıǵarıw kompleksinde boldı.

Xalıq sanı ósip, urbanizaciya keńeyip atırǵanı sapalı qurılıs materiallarına talaptı jıldan-jılǵa arttırmaqta. Mámleketimizde qurılıs materialları tarmaǵı sonıń ushın jedel rawajlandırılmaqta. Zamanagóy texnologiyalar alıp kelinip, joqarı nátiyjeli ónimler ózlestirilmekte.
«Namangan» erkin ekonomikalıq zonasında jaylasqan, «Turanbank» tárepinen qarjılandırılǵan gazoblok kárxanası usılardan biri. 40 million dollarlıq bul joybar sheńberinde Qıtay, Germaniya, Daniya sıyaqlı mámleketlerden innovaciyalıq texnologiyalar alıp kelinip ornatılǵan. Sonlıqtan, islep shıǵarılıp atırǵan ónimlerdiń sapası hám nátiyjeliligi joqarı.
Máselen, Germaniya texnologiyası energiya únemlewdi támiyinleydi. Bunday gazobloktan qurılǵan imarattı sırtqı izolyaciyalaw shárt bolmaydı, ishindegi ıssılıq hám salqınlıq tórt esege az joyıtıladı. Nátiyjede elektr energiyasınıń qárejeti 45 procentke shekem qısqaradı.
Óndiriste “Megaton” kárxanasına qaraslı “Namangan cement”tiń 550 markalı cementinen paydalanıladı. Bul arqalı qosımsha qun shınjırı jaratılǵan. Kárxanada 500 jańa jumıs ornı ashılǵan.
Mámleketimiz basshısı bul jerdegi jumıs procesin, laboratoriya hám ónimlerdi kózden ótkerdi. Juwapkerler ónimniń sapası, ıssı hám suwıqqa shıdamlılıǵı haqqında maǵlıwmat berdi.
– Qurılıs sanaatımız zaman talabına beyimlesip, sapalı ónimler islep shıǵarıp atırǵanı jaqsı, – dedi mámleketimiz basshısı. – Bunday innovaciyalıq texnologiyalardı import úlesi joqarı bolǵan basqa tarmaqlarda da qollanıw kerek. Sonda bazarda báseki, qarıydarlardıń tańlawı boladı, orınlarda jumıs ornı kóbeyedi. Onıń ushın izleniwsheń isbilermenlerdi qollap-quwatlawdı dawam ettiremiz.
Bul kárxanada jılına 600 mıń metr kub ónim islep shıǵarıladı. Bul wálayatta gerbishke bolǵan talaptıń 28 procentin qaplawı kútilmekte.
Joybardıń ekinshi basqıshında avtoklav gazoblok diywalı, arnawlı jelim, ximiyalıq aralaspa hám sıbawlardı lokalizaciyalaw rejelestirilgen.

ÓzA