16 jasqa tolmaǵan shaxsqa baylanıslı telekommunikaciya tarmaqlarınan yamasa internetten paydalanıp, uyatsız háreketler islegeni ushın juwapkershilik kúsheytilmekte. Sonday-aq, balalar súwretlengen pornografiyalıq ónimlerdi saqlaǵanı ushın juwapkershilik belgilenbekte.

Balalardı hár qıylı zorlıqlardan qorǵawǵa qaratılǵan jumıslardıń ámelge asırılıwına qaramastan, bul baǵdardaǵı qolaysız háreketler azaymay atır. Maǵlıwmatlarǵa bola, 2025-jıldıń 8 ayında jas óspirimlerge ádepsiz háreketler islew jınayatı 36 procentke artqan.

Oliy Majlis Nızamshılıq palatasındaǵı siyasiy partiyalar frakciyalarınıń májilislerinde “Balalardı zorlıqtan qorǵaw sistemasınıń jetilistiriliwi múnásibeti menen Ózbekstan Respublikasınıń ayırım nızam hújjetlerine ózgerisler hám qosımshalar kirgiziw haqqında”ǵı nızam joybarı dodalandı.

Sonıń ishinde, XDP frakciyasınıń májilisinde deputatlar joybardıń qabıl etiliwi balalardı jınısıy erkinlikke hám bala sawdasına qarsı jınayatlardan qorǵaw kepilliklerin kúsheytiwge tiykar bolatuǵının atap ótti. Qalaberdi, bul túrdegi jınayatlardı islegen shaxslardıń qılmısına sáykes jazaǵa tartılıwına xızmet etetuǵını aytıp ótildi.

– Bul nızam joybarı menen Jınayat hám Hákimshilik juwapkershilik haqqındaǵı kodekslerge jas óspirimlerdi qorǵaw boyınsha bir qatar ózgerisler hám qosımshalar kirgizilmekte, – deydi frakciya aǵzası Sayyora Imomova. – Sonday-aq, jas óspirimlerdi jábirleniwshi yamasa gúwa sıpatında sorawǵa alıw múddetleri de anıq belgilenbekte. Yaǵnıy, dawamlılıǵı 1 kún etip belgilenbekte. Sonıń menen birge, bul processlerde olarǵa juwapker shaxslar da birgelikte qatnasıwı múmkin ekenligi názerde tutılmaqta. Nızam joybarı jas óspirim jetpegen perzentlerimizdiń huqıqları menen máplerin qorǵawda áhmiyetli orın iyeleydi.

Frakciya dodalawlarında bildirilgen usınıslardan soń tiyisli qararlar qabıl etildi.

Muhtarama Komilova, ÓzA