Ózbekstan Respublikası Prezidenti Shavkat Mirziyoev 15-sentyabr kúni Tashkent wálayatınıń Bostanlıq rayonına bardı hám muǵallimler hám ustazlar menen sóylesti.

Mámleketimiz basshısı tálim-tárbiya sistemasında ayrıqsha órnek kórsetken xızmetkerlerden bir toparına mámleketlik sıylıqlardı saltanatlı túrde tapsırdı hám bilimlendiriwdiń sapasın arttırıw, muǵallim hám ustazlardı bunnan bılay da qollap-quwatlaw máselelerin dodaladı. Sonday-aq, rayonda ámelge asırılıp atırǵan dóretiwshilik jumısların kózden ótkerdi.
Dáslep mámleketimiz basshısı rayondaǵı “Renessans” balalar salamatlandırıw dem alıw orayında jaratılǵan sharayatlar menen tanıstı.
Mámleketimizde bilimlendiriw hám jaslar máselesi mámleketlik siyasat dárejesine kóterilgen. Onıń ushın kóplegen oqıw mákemeleri qurılıp, zamanagóy úskenelenbekte. Jaslarǵa ulıwma bilim beriw menen birge qábiletine qarap qánigelestirilgen bilimler de berilmekte. Sonıń ishinde, 14 Prezident mektebi, 201 qánigelesken, 2 sport hám 9 dóretiwshilik mektebi shólkemlestirildi. Olardaǵı oqıtıw hám bahalaw sisteması 1 mıń 500 mektep de engizildi.
Bul jumıslardıń logikalıq dawamı sıpatında bilimli oqıwshılardı tańlap, xalıqaralıq dárejede tárbiyalawǵa da ayrıqsha itibar qaratılmaqta. Ótken jılı Pán olimpiadaları orayı, bıyıl xalıqaralıq mektep shólkemlestirildi.
Mámleketimiz basshısınıń baslamasına muwapıq, jaslarımızdıń Amerikanıń “Pechak ligası” (The Ivy League) universitetlerine tayarlaw jolǵa qoyılmaqta. Onıń ushın milliy baǵdarlama qabıl etildi. Usı jılı dáslep 1,5 mıń oqıwshı tańlap alındı. Olarǵa Prezident hám qánigelesken mekteplerden 208 másláhátshi biriktirildi.
Bul “Renessans” dem alıw orayı usı sistemanıń bir bólegi boldı. Bul jerde jaslar jıl dawamında 3 háptelik intensiv oqıw kurslarında oqıtıladı. Jaqsı nátiyje kórsetken 40 ı “Pechak ligası” universitetlerine tájiriybe almasıw ushın jiberiledi.
Dem alıw orayı 500 ge shamalas oqıwshını qabıllaw quwatlılıǵına iye. Hákimshilik, oqıw imaratları hám jataqxanada zamanagóy sharayatlar jaratılǵan. Miymanxana, asxana hám avtomobil turıw orınları keliwshiler ushın qosımsha qolaylıq esaplanadı.
Jazda ótkerilgen seminarlarda pán olimpiadalarınıń jeńimpazları, shet tili sertifikatına iye jaslar, sociallıq qorǵawǵa mútáj shańaraq perzentleri qatnastı. Bul teń imkaniyatlardan paydalanǵan ul-qızlardıń bilimin arttırıp, keleshegine bekkem tiykar jarattı.
Sır emes, burın dem alıw orınlarına dem alıw hám kewil ashar orın sıpatında qaralǵan. Endi bul kózqaras pútkilley ózgerdi. “Renessans” oqıwshılardıń bilimlendiriw, mánawiyat hám innovaciya maydanına aylandı.
Prezidentimiz dem alıw orayı xanalarındaǵı sharayatlardı, jaslardıń oylap tabıwların kózden ótkerdi.
STEAM xanaları, samolyottı basqarıw simulyatorı, tábiyǵıy pánler laboratoriyaları balalardıń qızıǵıwshılıqların ámeliy kónlikpelerge aylandıradı. Olar kitapxanada bilimlerin, sport maydanshalarında salamatlıǵın bekkemleydi. Kórkem óner múyeshinde kórkem óner, ádebiyat baǵdarındaǵı oqıwlar qollap-quwatlanadı. Sulıw tábiyat, doslıq ortalıǵı jaslardıń keypiyatın, umtılısın arttıradı.
Mámleketimiz basshısı Jańa Ózbekstan universitetiniń basshıları hám pitkeriwshileri menen de sóylesti.
– Ózbekstan jaslarınıń potencialı, kúsh-ǵayratı, umtılısı kúshli. Biz mámleket bolıp, millet bolıp, sapalı bilimlendiriwdi támiyinlesek, perzentlerimizge hesh kim teń kele almaydı, olar barlıq tarawda jetekshi boladı, – dedi Shavkat Mirziyoev.
Tanısıw dawamında Al-Xorezmiy universiteti kampusınıń joybarı tanıstırıldı. Bul baslamanıń tiykarında da jaslardıń bilimli bolıwı, qábiletiniń rawajlanıwı ushın sharayat jaratıw maqset etilgen. Joybardı nátiyjeli ámelge asırıw boyınsha áhmiyetli wazıypalar belgilep berildi.
Bul jerde Muǵallimler hám ustazlar kúni múnásibeti menen saltanatlı ilaj bolıp ótti.
Prezident Shavkat Mirziyoev sóziniń basında óz ómirin jas áwladqa tálim-tárbiya beriwdey eń ullı iske baǵıshlap kiyatırǵan barlıq muǵallimlerdi qutlıqlap, olarǵa tereń húrmet-izzetin bildirdi.
Ózbekstan Respublikası Prezidentiniń usı jıl 11-sentyabrdegi pármanına muwapıq, tálim-tárbiya sistemasında ayrıqsha órnek kórsetken xızmetkerlerden bir toparı húrmetli ataq, orden hám medallar menen sıylıqlanǵan edi. Olardıń arasında óz qarjısı esabınan mektepler qurǵan saqawatlı isbilermenler, bilimlendiriwdegi aldınǵı jetiskenliklerdi engiziwge járdem berip atırǵan sırt elli sherikler de bar.
Máresimde mine usı sıylıqlar saltanatlı túrde tapsırıldı.
– Men kóplegen taraw wákillerine ataq, orden hám medallar beremen. Biraq ustazlar sıylıqlanatuǵın kúndi saǵınıp kútemen. Kókiregińizdi bezep turǵan orden-medallar múbárek bolsın. Elimizde joqarı sıylıqlarǵa múnásip pidayı muǵallimler kóbeysin, – dedi Prezident.
Sıylıqlanǵanlardıń atınan shıǵıp sóylegenler bilimlendiriw tarawına itibarı, ustazǵa joqarı húrmeti ushın mámleketimiz basshısına minnetdarshılıq bildirdi.
Bunnan keyin tarawdı rawajlandırıw ilajları boyınsha sóylesiw bolıp ótti. Onda videobaylanıs arqalı pútkil respublikamızdan 40 mıńnan aslam ustaz hám muǵallimler qatnastı.
Mámleketimiz basshısı májilistegi shıǵıp sóylegen sózinde sońǵı segiz jılda mámleketimiz ekonomikası 2 esege óskenin, jalpı ishki ónimniń kólemi jıldıń aqırına shekem 130 milliard dollarǵa jetiwin atap ótti.
Usı ekonomikalıq tiykarda ótken segiz jılda bilimlendiriw hám ilim tarawına qárejetler 6 esege arttırılıp, 378 trillion sum qarjı ajıratılǵan. Prezidentimiz bilimlendiriwdiń sapasın arttırıw, muǵallim hám ustazlardıń miynet hám jasaw sharayatın jaqsılaw reformalardıń eń tiykarǵı baǵdarı bolıp qalatuǵının atap ótti.
Májiliste bilimlendiriwdiń barlıq buwınların rawajlandırıw, jaslar hám pedagoglar ushın imkaniyatlardı jáne de keńeytiwge qaratılǵan baslamalar belgilendi.
2017-jılı 4 mıńnan aslam máhállede bir de balalar baqshası joq edi, qamtıp alıwı 27 procentten artpaytuǵın edi. Búgingi kúnde baqshalardıń sanı 38 mıńnan, qamtıp alıwı bolsa 78 procentten arttı. Jaqında járiyalanǵan jańa jeńillik hám imkaniyatlar nátiyjesinde mektepke shekemgi bilimlendiriw kirip barmaǵan birde-bir máhálle qalmaydı, qamtıp alıw da 80 procentten kem bolmaydı.
Baqsha basshısı hám pedagoglardıń aylıǵı derlik 2 esege arttı. Jeke menshik baqshalardaǵı tárbiyashılardıń aylıǵı hám bala qárejetiniń bir bólegi byudjetten qaplap beriletuǵın sistema engiziledi.
Endi mámleketlik hám jeke menshik baqsha tárbiyashıların jumıstan ajıralmaǵan halda joqarı bilimlendiriwde oqıtıw jolǵa qoyıladı. Prezident mektepleri sıyaqlı hár bir wálayatta “Jańa áwlad” baqshaları shólkemlestirilip, tárbiyashılar aldınǵı pedagogikalıq texnologiyalardı úyrenedi.
Bilimlendiriwdiń eń uzaq dawam etetuǵın, sheshiwshi basqıshı bul – mektep bilimlendiriwi.
Mámleketimiz xalqı sońǵı 34 jılda 2 esege ósip, 38 millionnan astı. Házirgi waqıtta mekteplerde 6,5 million oqıwshı bilim almaqta. Keyingi segiz jılda 500 ge shamalas jańa mekteplerdiń qurılǵanı, barlarınıń keńeytilgeni esabınan 1 million oqıwshı ornı jaratıldı. 200 mıńnan aslam ul-qızlar jeke menshik mekteplerde oqıp atır.
Endi mektep dáwirinde oqıwshılardı qábiletine qarap kásip yamasa joqarı bilimlendiriwge baǵdarlawǵa 9-hám 11-klass oqıwshıları ushın birden-bir mámleketlik imtixanlar engiziledi. Bul arqalı 400 mıńǵa shamalas 9-klass pitkeriwshileri texnikumlarǵa qamtıp alınadı. Oqıwdı mektepte dawam ettirip, joqarı oqıw ornına kiriw tileginde bolǵan jaslarǵa pánler tańlaw tiykarında tereńlestirilip ótiledi.
Hár jılı onlaǵan mıń mektep oqıwshıları shet tili hám pánler boyınsha xalıqaralıq sertifikatlar almaqta. Endi bunday sertifikatlar mekteptegi juwmaqlawshı imtixanlarda da tán alınadı.
Mámleketimiz basshısı kásiplik bilimlendiriw máselesine ayrıqsha toqtap ótti. Taraw ushın 2026-jıl – Jaslardı zamanagóy kásip-ónerge úyretiw jılı bolatuǵını atap ótildi.
Usı maqsette Kásiplik bilimlendiriw agentligi shólkemlestiriledi. Agentliktiń tiykarǵı wazıypası barlıq 598 texnikumǵa jańa ortalıq alıp kiriw hám xalıqaralıq standartlardı engiziwden ibarat boladı.
Bir jıl ishinde 100 texnikumda Germaniya, Shveycariya, Qıtay, Koreya, Ullı Britaniya sıyaqlı mámleketlerdiń bilimlendiriw shólkemleri menen birge islesiw jolǵa qoyılıp, olardıń eń aldınǵı kásiplik bilimlendiriw baǵdarlamaları engiziledi.
Sonday-aq, kásiplik kónlikpesi bar qálegen talaban bul texnikumlarda sırt mámleketlerdiń mamanlıqtı bahalaw sisteması arqalı imtixan tapsırılıp, xalıqaralıq sertifikat alıwı múmkin boladı.
Bıyılǵı oqıw jılınan Angliyanıń “Pearson” kompaniyası menen aymaqlardaǵı 14 texnikumda “BTEC” xalıqaralıq baǵdarlaması baslandı. Bul arqalı jaslar xalıqaralıq standartlar tiykarında turizm, málimleme texnologiyaları, medicina, qurılıs, logistika, elektrotexnika, energetika, mashina qurılısı, biotexnologiya, kreativ ekonomika sıyaqlı baǵdarlarda talap joqarı kásiplerdi iyeleydi.
Kelesi jılı sanaatta derlik 45 milliard dollarlıq 456 iri joybar baslanadı. Endi texnikumlarda “investor – tarmaq – texnikum” shınjırı tiykarında hár bir joybar boyınsha dual bilimlendiriw jolǵa qoyıladı.
Kárxanalar menen anıq joybarları bolǵan texnikumlar arasında zamanagóy ustaxanalar qurıw boyınsha tańlaw ótkeriledi. Tańlaw jeńimpazlarına ustaxana ushın zamanagóy úskene hám inventarlar, sport ánjamları alıp beriledi.
Ulıwma, dual bilimlendiriw menen qamtıp alıw 5 esege arttırıladı. Birge islesiwshi kárxanalarǵa 5 milliard sumǵa shekem jeńilletilgen kredit ajıratıladı, dual bilimlendiriw arqalı jumıs islep atırǵan oqıwshılar ushın birden-bir sociallıq tólem eki esege qısqartıladı.
Jańa texnologiyalardı ózlestiriw, jumıs tabıwda shet tillerin biliw oǵada áhmiyetli. Sol sebepli, texnikumlardaǵı shet tilleri ushın ajıratılǵan saatlar 4 esege kóbeytiledi.
Prezidentimizdiń qararına muwapıq, mekteplerde másláhátshi lawazımı engizilmekte. Endi olar 7-klasstan baslap oqıwshılardı pánlerdi ózlestiriwi hám kásiplik qızıǵıwshılıǵı boyınsha tańlap, 9-klasstı pitkergeninde texnikumlarǵa jollama beredi.
Bunnan tısqarı, bıyıl 11-klasstı pitkerip, joqarı oqıw ornına kire almaǵan 200 mıń jaslar da texnikumlarda 3-6 aylıq qısqa múddetli baǵdarlamalar tiykarında kásipke oqıtıladı.
– Bul jańa baslamalarımızdan maqset ne? Hár bir jastı kásip-óner arqalı dáramatlı etsek, shańaraqlardıń ruwzıgershiligi pútin boladı, máhállelerde tınıshlıq húkim súredi. Bunnan ata-analar da razı boladı,dep oylayman – dedi Shavkat Mirziyoev.
Texnikumdaǵı oqıtıwshı hám ustalardıń mamanlıǵın, jámiyettegi abırayın arttırıw ilajları da belgilendi. Sonıń ishinde, mekteptegi sıyaqlı texnikumlardıń oqıtıwshı hám ustaları ushın kásiplik sertifikatlaw sisteması engiziledi. Bul arqalı texnikum ustazlarına milliy sertifikat ushın aylıǵınıń 30 procenti, xalıqaralıq sertifikatqa bolsa 50 procenti muǵdarında ústeme tólenedi. Bunnan texnikumlardıń 30 mıńlıq pedagoglar jámááti payda kóredi. Bul mákemelerdiń direktorı hám orınbasarlarınıń aylıq miynet haqısı da arttırıladı. Endi texnikumlarda da ilimiy dáreje hám ataqlar ushın ústemeler tólew jolǵa qoyıladı.
Keyingi jıllarda, ásirese, joqarı bilimlendiriwge qamtıp alıw jedel arttı. Joqarı oqıw orınlarınıń sanı 77 den 202 ge, ulıwma studentlerdiń sanı 250 mıńnan 1,5 millionǵa jetti.
Jańa industriallıq dáwir – “tórtinshi sanaat revolyuciyası”n ámelge asırıw ushın dúnyada “texnologiyalıq minerallar”ǵa talap bir neshe esege artpaqta. Tallawlarǵa bola, dúnyadaǵı volfram, molibden, cink hám titan rezervleriniń 10-15 procenti regionımızǵa tuwra keledi. Bul úlken resurslardı joqarı qosımsha qunlı ónimge aylandırıw ushın bizge bárinen burın ilim, bilim hám innovaciya kerek.
Sonıń ushın ilim hám biznes wákillerin ushırastırıp, paydalı birgelikte isleytuǵın sistema shólkemlestiriletuǵını aytıldı. Oylap tabılıwlardıń tájiriybe-sınaq jumıslarınıń qárejetlerin qaplawǵa qosımsha 100 milliard sum ajıratılatuǵını belgilendi.
Jaqında oylap tabıwshılar arasında toǵız baǵdarda ótkerilgen tańlaw jeńimpazlarına elektromobil berildi. Ekinshi orın iyeleri sırt elge stajirovkaǵa jiberiledi, úshinshi orındı iyelegenler bolsa aqshalay sıylıqlar menen sıylıqlandı.
Endi bunday tańlawlar joqarı bilimlendiriwdiń hár bir baǵdarında, oqıtıwshılar hám studentler arasında da ótkeriletuǵını járiyalandı.
Joqarı oqıw orınlarında sırt el TOP-500 diń universitetleri menen birgelikte málimleme texnologiyaları, jasalma intellekt, agrotexnologiya, medicina, “jasıl” energetika sıyaqlı tiykarǵı baǵdarlarda birgeliktegi bilimlendiriw baǵdarlamaları jolǵa qoyıladı. TOP-100likke kirgen universitetlerdiń filialları ashıladı.
Prezidentimiz muǵallim hám ustazlardıń sociallıq sharayatların jaqsılaw boyınsha da bir qatar baslamalardı bildirdi.
Jańa jıldan baslap keminde 15 jıl stajǵa iye bolǵan joqarı kategoriyalı pedagoglarǵa ipoteka krediti baslanǵısh tóleminiń 25 procenti qaplap beriledi.
Kelesi oqıw jılında mámleketlik joqarı oqıw orınlarına oqıwǵa kirgen pedagoglar perzentleriniń shártnama summasına 30 procent shegirme beriledi.
Muǵallimler jańa bilimlendiriw texnologiyaların keńnen qollanıwı ushın kompyuter satıp alıwǵa 10 million sumǵa shekem jeńilletilgen kredit beriledi. Kelesi jıldan pedagoglar ushın mámleketlik xızmetler tólemi 2 esege azaytıladı.
Pán muǵallimleri sıyaqlı baslawısh bilim beriw muǵallimleri ushın da milliy sertifikat beriw sisteması engiziledi. Sertifikat alǵanlarǵa hár ayda 15 procent ústeme tólenedi.
Bakalavr basqıshın ayrıqsha diplom menen pitkerip, mektepke jumısqa kirgenlerge avtomat túrde 2-kánigelik kategoriyası, magistrlerge bolsa 1-kánigelik kategoriyası beriledi. Dúnyadaǵı TOP-300 joqarı oqıw orınlarına oqıwǵa kirgen pedagoglarǵa 20 mıń dollarǵa shekem jeńilletilgen tálim krediti ajıratıladı.
Májiliste oqıtıwshı hám studentler, bilimlendiriw shólkemleriniń basshıları menen sóylesilip, pikir-usınısları tıńlandı.
Usı kúni Prezident Shavkat Mirziyoev Tashkent wálayatınıń Bostanlıq rayonındaǵı jańa turizm kompleksiniń imkaniyatları menen jaqınnan tanıstı.
Keyingi jılları aymaqta infrastruktura rawajlandırılıp, jıldıń tórt máwsiminde qızıqlı sayaxat ushın qolaylı sharayat jaratıldı. Ámirsay, Shınarkent, CHarvaq dárwazası sıyaqlı úlken kompleksler, zamanagóy miymanxanalar, dem alıw hám ulıwma awqatlanıw orınları iske qosıldı.
Endi bulardıń qatarına “CHimyon” xalıqaralıq ulıwma máwsimlik kurortı da qosıladı. Franciyanıń “MND” kompaniyası menen birgelikte ámelge asırılıp atırǵan bul joybar ushın 1 mıń 278 gektar maydan ajıratılǵan.
Joybar sheńberinde miymanxanalar hám teńiz qáddinen 3 mıń 300 metr biyiklikke shekemgi aspa jol qurıladı. Bul tolıq máwsimlik turizmdi támiyinleydi. Qısta lıja hám snoubord, basqa aylarda bolsa taw turizmi hám kewil ashar dem alıw imkaniyatları payda boladı.
Mámleketimiz basshısı bul jerdegi miymanxana, restoran hám sawda komplekslerin kózden ótkerdi.
Sonıń ishinde, 6 qabatlı zamanagóy miymanxana 320 turistti qabıl etiw imkaniyatına iye. Onda jıl dawamında ortasha 45 mıń turistke xızmet kórsetedi. Itibarlı tárepi, bul jerde “Wyndham” brendi menen birgelikte qánigeli basqarıw jolǵa qoyılmaqta. Bul tek ǵana xızmet sapası emes, al mámleketimiz turizminiń xalıqaralıq abırayın arttırıwda da áhmiyetli bolıp esaplanadı. Miymanxananı noyabrde iske túsiriw rejelestirilgen.
Aymaqtaǵı jáne bir joybar sheńberinde 7 hám 5 qabatlı apart-oteller, 7 qabatlı miymanxana hám 2 qabatlı restoran qurıldı. Olarda da xızmet sapasın xalıqaralıq standartlar dárejesine alıp shıǵıw názerde tutılǵan. Jıl dawamında ortasha 54 mıńnan aslam miymandı qabıl etiw mólsherlengen. Komplekste 100 den aslam adam jumıslı boladı. Házirgi waqıtta 6 shale qurılısı dawam etpekte.
Prezidentimiz jańa kompleksler qurıw hám xızmet kórsetiwde aldınǵı tájiriybelerdi qollanıw, xızmetkerlerdiń mamanlıǵın arttırıw áhmiyetli ekenligin atap ótti. Aymaqtaǵı imkaniyatlardı turizm platformalarında úgit-násiyatlap, jergilikli hám sırt elli turistlerdi jedel tartıw boyınsha kórsetpeler berildi.
Bul jerde 300 avtomobilge mólsherlengen avtomobiller turıw ornı da bar. Onıń birinshi qabatında restoran, balalar maydanshası hám sawda kompleksi shólkemlestirilgen. Bul tek ǵana qolaylılıq emes, al turistler ushın qosımsha xızmetlerdi bir pútin usınıw imkaniyatın da beredi.
Ulıwma, “CHimyon” ulıwma máwsimlik kurortı nátiyjesinde xızmet kórsetiw tarawında mıńlaǵan jańa jumıs orınları, jergilikli xalıq ushın turaqlı dáramat dáregi payda boladı. Turistlerge eń zamanagóy xızmetlerdi usınıp, mámleketimizge keliwshi turistlerdiń sanın sezilerli dárejede arttıradı.
Bostanlıqta turizm basqa da tarawlar menen úylesikli túrde rawajlanıp, pútkil aymaqtıń ekonomikalıq kórinisin ózgertip atır. Sawda hám xızmetlerdiń túri, transportlardıń háreketi kóbeymekte. Sol sebepli ulıwma máwsimlik kurort joybarı sheńberinde avtomobil jolında tunnel de qurıldı.
Bul imarat quramına uzınlıǵı 1 mıń 450 metr bolǵan tiykarǵı jol bólegi, 2 kópir hám piyadalar jolları kiredi. Ol aymaqtaǵı taw kurortlarına alıp barıwshı tiykarǵı joldı qısqartadı. Qáwipsizlikti arttırıp, transportlardıń háreketin jeńillestiredi. Tunnel arqalı saatına 500 den aslam avtomashina qáwipsiz hám qolaylı háreketleniwi múmkin.
Jollardıń qolaylıǵı aymaqtıń turizm potencialın tolıq iske qosıw hám ekonomikanı rawajlandırıwdıń áhmiyetli faktorı ekeni atap ótildi. Sonıń menen birge, tábiyattı taza saqlaw, dem alıwshılardıń ekologiyalıq mádeniyatın arttırıw áhmiyetli ekenligi atap ótildi.
Bunday joybarlar turistlerge qolaylıq jaratıw menen birge mámleketimizdiń investiciyalıq hám mádeniy tartımlılıǵın arttıradı. Bostanlıq búgingi kúnde tábiyǵıy gózzallıǵı, zamanagóy kompleksleri hám joqarı xızmet kórsetiw mádeniyatı menen mine, usınday orayǵa aylanıp barmaqta.
Bostanlıq rayonına saparı dawamında Prezident Shavkat Mirziyoev CHimyon máhállesinde qurılıp atırǵan agrosanaat baǵın da barıp kórdi.
Bostanlıqta suw mol, jeri ónimdarlı. Soǵan tiykarlanıp, turizm hám agrar taraw úylesikli túrde rawajlandırılmaqta. Sonıń ishinde, CHimyon máhállesinde 3 mıń gektar maydanda malina, qaraǵat, qulpınay, toǵay ǵozası sıyaqlı miywelerdi jetistiriw jolǵa qoyılmaqta.
Joybardıń ulıwma bahası 60 million dollardan aslam. Bul qarjı esabınan baǵlar shólkemlestiriledi, miyweni qayta islew kárxanaları jáne úlken sıyımlılıqtaǵı qoymaxanalar qurıladı.
Házirgi waqıtta 50 gektar maydanda malina hám qulpınaydıń sırt elge eksport etiwge qolaylı sortları egilgen. Baǵ tolıq tamshılatıp suwǵarıladı. Malinanıń hár gektarınan 400 million sum, qulpınaydan bolsa 500 million sumǵa shekem dáramat alınadı.
Joybar tolıq ámelge asırılǵannan soń jılına 24 mıń tonnaǵa shamalas ónim jetistiriledi. Onıń salmaqlı bólegi – toǵay ǵozası hám miyweler eksportqa baǵdarlanadı. Eń áhmiyetlisi, baǵlarda 12 mıńnan aslam adam jumıslı boladı.

Ziyodulla JONIBEKOV,
Ikrom AVVALBOEV,
Abdulaliz RUSTAMOV,
ÓzAnıń arnawlı xabarshıları