Oliy Majlis Nızamshılıq palatasınıń Korrupciyaǵa qarsı gúresiw hám sud-huqıq máseleleri komiteti tárepinen Ózbekstan Respublikasında korrupciyaǵa qarsı gúresiw haqqındaǵı milliy bayanat dáslepki tárizde kórip shıǵıldı.

Atap ótilgenindey, sońǵı jılları mámleketimizde korrupciyanıń aldın alıw hám oǵan qarsı gúresiwdiń huqıqıy hám institucionallıq tiykarları jetilistirildi. Tarawda mámleketlik siyasattıń izbe-izligin támiyinlew maqsetinde korrupciyaǵa qarsı gúresiw boyınsha 2023-2024-jıllarǵa mólsherlengen mámleketlik baǵdarlama qabıl etilip, ashıq járiyalanıwı kerek bolǵan maǵlıwmatlar dizimi 35 ten 40 qa keńeytildi.

Agentlik tárepinen baǵdarlamanıń orınlanıwı turaqlı monitoring etilip, hár sherekte Milliy keńes májilislerinde juwapker shólkem basshılarınıń esabatları tıńlandı. Nátiyjede baǵdarlamada belgilengen 9 baǵdardaǵı 30 bántten ibarat wazıypa hám tapsırmalardıń orınlanıwı tolıq támiyinlendi.

2024-jılı korrupciyaǵa qarsı gúresiw boyınsha preventiv mexanizmlerdi jáne de keńnen engiziw, korrupciyanıń aqıbetleri menen emes, al onıń aldın alıwǵa qaratılǵan jumıslardı kúsheytiw baǵdarında belgili jumıslar ámelge asırıldı. Sonıń ishinde, ótken jılı korrupciyaǵa qarsı gúresiw tarawında ámelge asırılıp atırǵan reformalardı huqıqıy jaqtan támiyinlewge qaratılǵan 8 normativlik-huqıqıy hújjet qabıl etildi.

Mápler soqlıǵısıwınıń aldın alıw mexanizmleri islep shıǵılıp, nızam menen tártipke salındı. Agentlik tárepinen ministrlikler hám uyımlardıń 327 normativlik-huqıqıy hújjet joybarı korrupciyaǵa qarsı ekspertizadan ótkerildi.

Búgingi kúnde Birden-bir interaktiv mámleketlik xızmetler portalı arqalı kórsetiletuǵın xızmetlerdiń sanı 710 nan arttı.

Komitet májilisinde mámleketimiz basshısınıń usı jıl 5-mart kúni ótkerilgen Korrupciyaǵa qarsı gúresiw milliy keńesiniń májilisindegi shıǵıp sóylegen sózinde belgilengen tiykarǵı wazıypalardıń orınlanıwı boyınsha Agentlik tárepinen ámelge asırılıp atırǵan jumıslar haqqında da maǵlıwmat berildi.

Deputatlar tárepinen korrupciyaǵa qarsı gúresiw baǵdarında ámelge asırılǵan unamlı jumıslar menen birge, bul tarawda tolıq paydalanılmaǵan imkaniyatlar hám itibar qaratılıwı zárúr bolǵan máseleler bar ekenligi atap ótildi. Atap aytqanda, shólkemlerdiń korrupciyaǵa qarsı ishki qadaǵalaw strukturalarınıń jumısında mápler soqlıǵısıwı menen baylanıslı faktorlar tolıq saplastırılmaǵanı sınǵa alındı.

Dodalawlar dawamında Agentlik tárepinen korrupciyaǵa baylanıslı, birinshi gezekte, byudjet qarjılarınıń jumsalıwı, mámleketlik aktivlerdiń realizaciyalanıwı, investiciyalıq joybarlardıń ámelge asırılıwına baylanıslı materiallardı úyreniw, lawazımlı shaxslardıń qararlarınıń nızamlılıǵı boyınsha ótkerilip atırǵan qadaǵalaw nátiyjeliligin arttırıw boyınsha usınıslar berildi.

Muhtarama KOMILOVA,
ÓzAnıń xabarshısı