Franciya parlamentiniń tiyisli komissiyası basshısı, deputat Artur Delaport Parij prokuraturasına “TikTok” sociallıq tarmaǵı ústinen shaǵım etti. Onıń pikirinshe, struktura bul tarmaq paydalanıwshılarınıń densawlıǵı hám ómirin qastan qáwipke qoymaqta, degen juwmaqqa kelgen hám sonnan keyin ol prokuraturaǵa múrájat etiwge májbúr bolǵan.
Komissiya sociallıq tarmaqta óz janına qastıyanlıq etiw, haywanlarǵa miyrimsiz múnásibette bolıw, sonday-aq, ekstremizm hám ksenofobiya qásiyetine iye materiallardıń tarqalıwı tiykarında Tik Toktıń jas óspirimlerge ruwxıy tásirin úyreniw ushın dúzilgen.
– Komissiyanıń juwmaǵın biykarlap bolmaydı, – degen siyasatshı “Frans-Info” radiosı efirinde. – “TikTok” óz paydalanıwshılarınıń densawlıǵı hám ómirin bile tura qáwipke qoyǵan. Sonıń ushın prokuratura menen baylanısıwǵa qarar ettim. Tarmaq basshıları bir qatar “jınayıy huqıqbuzarlıq”qa jol qoyǵan. Sonday-aq, xızmetkerler “jalǵan kórsetpe bergen”. Yaǵnıy, olar nızamdı bilmeymen, dep ótirik aytadı.
Aprel ayında orınbasar hám burınǵı bas ministr Gabriel Attal internetke ǵárezli bolıp qalıwǵa qarsı gúresiw boyınsha “radikal ilajlar” sheńberinde 15 jasqa shekemgi balalar ushın sociallıq tarmaqqa kiriwdi qadaǵan etiw hám túngi waqıtta jas óspirimler ushın sheklew qoyıwdı usınıs etken edi. Internet-platformalardıń “tartımlılıǵı”n tómenletiw kerek. Máselen, 30 minuttan soń interfeysti aq-qara rejimge ótkeriw kerek, dep esaplaydı deputat.
Iyun ayınıń basında Prezident Emmanuel Makron eger Evropa Awqamı anıq qadaǵan etpese, 15 jasqa shekemgi óspirimlerdiń sociallıq tarmaqtan paydalanıwı qadaǵan etiliwin aytqan edi.
Óz gezeginde “TikTok” platforması húkimettiń sociallıq tarmaqtan paydalanıwshılardıń densawlıǵına qáwip tuwdırıp atırǵanı haqqındaǵı dawalardı qatań biykarladı, dep jazadı “Franse-Press” agentligi.

S.Rahimov, ÓzA