“Anadolu” málimleme agentliginiń xabar beriwinshe, Qırǵızstanda Túrkiy mámleketler shólkemine aǵza mámleketler diniy uyımları basshılarınıń VI májilisi bolıp ótti. Ánjumanda Ózbekstan musılmanları mákemesiniń baslıǵı, Bas muftiy Nuriddin Xoliqnazar háziretleri de qatnastı.

Ózbekstan wákili mámleketimiz bas diniy basqarması óz jumısın izbe-iz rawajlandırıp, xalıqaralıq maydandaǵı abırayın bekkemlep atırǵanına ayrıqsha itibar berdi:
– Shólkemimiz tek ǵana regionallıq turaqlılıq hám rawajlanıw emes, al keleshek áwladlar ushın bekkem tiykar jaratıw kózqarasınan da turmıslıq áhmiyetke iye. Mámleket hám húkimet basshılarınıń háreketi menen jámáátimiz túrkiy xalıqlar birligin bekkemlew, ulıwma mápti qorǵaw, islam dúnyasında júz berip atırǵan waqıyalarǵa múnásip qatnas jasaw jolında isenimli qádem taslamaqta.
Ózbekstan muftiyi shańaraqlıq mashqalalardı sheshiwde fatvonıń áhmiyetine toqtap ótip, túrk dúnyası klimat ózgeriwi, toǵay órtleri, suw jetispewshiligi, shólleniw, ekologiya mashqalası sıyaqlı áhmiyetli máselelerge dus kelip atırǵanın atap ótti.
TMSh Bas xatkeri Kubanichbek Omuraliev túrk-islam qádiriyatların qorǵaw hám qollap-quwatlaw, islamafobiya hám radikalizmge qarsı gúresiw, sonday-aq, diniy mákemelerdiń birge islesiwin bekkemlew áhmiyetli ekenligine itibar qarattı.
Aǵza mámleketler diniy uyım basshıları VI májilisi Fatvo keńesi tárepinen qabıl etilgen juwmaqlawshı hújjet maqullandı.
Ózbekstannıń usınısı menen klimat ózgeriwi, tábiyattı qorǵaw hám qorshaǵan ortalıq mashqalasın sheshiwge shaqırıldı. Gezektegi májilis Ázerbayjanda ótkeriliwi belgilendi. Esletip ótemiz, dáslepki ánjuman 2022-jılı Stambulda, keyin Túrkstan (Qazaqstan), Baku, Shusha (Ázerbayjan), Astana (Qazaqstan) hám Tashkent (Ózbekstan) qalalarında shólkemlestirilgen.

Muharrama Pirmatova, ÓzA