Qaraqalpaqstan Respublikası Málimleme-kitapxana orayında ótkerilgen Narjan Atabaevanıń «Muhabbat márgiyası» atamasındaǵı jańa kitabınıń prezentaciyasına baǵıshlanǵan ilajda student-jaslar, ádebiyat ıqlasbentleri jıynaldı.

Ilajda Qaraqalpaqstan Jazıwshılar awqamınıń aǵzası Baxıtlı Sarıbaev, «Avangard» baspasınıń redaktorı Nadira Qayıpbergenova hám basqalar sózge shıǵıp, jaslardıń mánawiyatın kóteriwde kitap oqıw mádeniyatınıń ornı hám áhmiyetin, xalqımızdı kitapqumar milletke aylandırıw jolında elimizde zárúrli barlıq ilajlar ámelge asırılıp atırǵanın atap ótti.
Tórt povestten ibarat kitapta analıq, perzentlik, doslıq, tuwısqanlıq baylanısları, tuwılǵan jerge, xalqına hám yarǵa degen mehir-muxabbat sezimi jırlanadı. Turmıslıq waqıyalardan alıp jazılǵan shıǵarmalar kitaptıń tartımlıǵın hám ómirsheńligin támiyinlep bergen. «Shaxzada Málik, nóker Sádir hám Íǵlımxan sókshiniń balası», «Qatsha», «Oǵılnabat», «Muhabbat márgiyası» povestleri búgingi kún jaslarına úlgi bolarlıqtay aǵla sezimler hám pazıyletlerdi ulıǵlaydı.
Avtor óziniń qaharmanların jaqsı yamasa jaman, dep ajıratpaydı. Oqıwshı kitaptı oqıp otırıp pikirleydi, talqılaydı, qaharmanlardıń átirapında júz berip atırǵan waqıyalardı janlı súwretlerde kóredi hám sońında ózi juwmaq shıǵaradı.
Avtordıń povestleri hám gúrrińlerinen ibarat «Bul – Muxabbat edi…», «Gúllerdiń bir danası», «Gúzgi marafon» kitapları ótken jıllar dawamında kóp kitapqumarlardıń kewlinen jay aldı.
– Usı kitapxanada 2-12-sentyabr kúnleri aralıǵında «Kitap hám kitapqumarlıq hápteligi» ótkerilmekte, -deydi Berdaq atındaǵı Qaraqalpaq mámleketlik universiteti Qaraqalpaq filologiyası fakulteti studenti Nazira Yaqıpbaeva. – Háptelik sebep jańa baspadan shıqqan kitaplar menen tanısıp, kórkem óner, mádeniyat hám sport tarawları wákilleri menen ushırasıw baxtına miyasar bolıp atırmız.
Prezentaciya dawamında N.Atabaevanıń dóretiwshilik jolı hám jańa kitabı haqqında keń túrde maǵlıwmat berildi.

Qaraqalpaqstan xabar agentligi