Prezident Shavkat Mirziyoev xalıqtı hám awıl xojalıǵın dizimge alıw jumısların nátiyjeli shólkemlestiriwge baylanıslı usınıslardıń prezentaciyası menen tanıstı.
Mámleketti rawajlandırıw perspektivaların belgilewde xalıqtıń demografiyalıq hám sociallıq-ekonomikalıq ózgeshelikleri, jasaw dárejesi hám abadanlıǵı, awıl xojalıǵınıń jaǵdayın anıqlaw júdá áhmiyetli. Bunda dizimge alıw ayrıqsha áhmiyetke iye.
Elimizde ulıwma milliy dizimge alıw sońǵı márte 1989-jılı ótkerilgen. Keyingi jılları bul baǵdarda bir qatar jumıslar ámelge asırıldı. Sonıń ishinde, “Xalıqtı dizimge alıw haqqında”ǵı nızam qabıl etilip, xalıqtı hár 10 jılda, awıl xojalıǵın bolsa hár 5 jılda keminde bir márte dizimge alıw belgilengen.
Sonlıqtan, 2021-jılı xalıqtı, 2022-jılı bolsa awıl xojalıǵın sınaw tárizindegi dizimge alıw ilajları ótkerildi. Biraq tolıq dizimge alıwdı ótkeriw ushın zárúr faktorlar hám xalıqaralıq tájiriybelerdi úyreniw jáne tiyisli ilajlardı islep shıǵıw belgili bir waqıttı talap etetuǵını sebepli, bul ilaj keyinge qaldırılǵan edi.
Prezentaciyada xalıqaralıq tájiriybeden kelip shıǵıp hám Jáhán banki, YuNFPA hám FAO shólkemleriniń qatnasıwında islep shıǵılǵan xalıqtı hám awıl xojalıǵın bir waqıtta dizimge alıw usınısı kórip shıǵıldı.
Oǵan bola, Ózbekstanda dizimge alıw ilajları 2026-jıl 15-yanvardan 28-fevralǵa shekem ótkeriledi. Onıń dáslepki 17 kúni internet arqalı, keyingi bir ay dawamında bolsa “máhálle jetiligi”niń qatnasıwında úyme-úy júrip ámelge asırılıwı belgilenbekte.
Bul usıl arqalı qárejetler sezilerli qısqarıp, 1,3 trillion sum qarjı únemlenedi. Sonday-aq, dizimge alıw processleri ápiwayı hám ashıq-aydın tárizde shólkemlestiriledi. Sorawlardıń sanı aldın rejelestirilgen 328 den 71 ge qısqartıldı.
Dizimge alıw nátiyjesinde Evropa statistika konferenciyasınıń 2020-jıldaǵı usınısları tiykarında 38 million xalıqtıń quramı hám migraciyası, shańaraqlıq jaǵdayı, jumıs túri, dáramat dárekleri haqqında birden-bir maǵlıwmatlar bazası qáliplestiriledi.
Mámleketimizdegi awıl xojalıǵı jerlerinen paydalanıw jaǵdayı, sharwa malları hám quslardıń sanı anıqlanadı. Bul arqalı awıl xojalıǵına baǵdarlanıp atırǵan jıllıq 25,6 trillion sum, sonıń ishinde, 2,2 trillion sum byudjet qarjılarınıń nátiyjeliligi, tarawdaǵı xızmetlerdiń kólemi hám azıq-awqat qáwipsizligin támiyinlew ushın zárúr maǵlıwmatlar toplamı jaratıladı.
Dizimge alıw processlerin nátiyjeli ámelge asırıw ushın “máhálle jetiligi” arnawlı oqıw baǵdarlaması tiykarında tayarlanadı hám xoshametlenedi. Bunıń ushın Jáhán bankiniń járdeminde ámelge asırılıp atırǵan statistika sistemasın bekkemlew joybarınıń qarjıları qaratıladı.
Sonday-aq, ǵalaba xabar quralları, sociallıq tarmaqlar arqalı keńnen úgit-násiyatlaw jumısları jolǵa qoyıladı. Arnawlı kórsetiw hám videorolikler kórsetilip, puqaralardıń xabardarlıǵı arttırıladı.
Ulıwma, bul ilajlar xalıq hám awıl xojalıǵınıń real kórsetkishlerin anıq belgilew, mámleketlik baǵdarlamalardı maqsetli hám nátiyjeli ámelge asırıw ushın úlken áhmiyetke iye boladı.
Mámleketimiz basshısı usınıslardı maqullap, xalıqtı hám awıl xojalıǵın dizimge alıw ilajların sistemalı hám sapalı ámelge asırıw boyınsha juwapkerlerge kórsetpeler berdi.

ÓzA