Qaraqalpaqstan Respublikası Joqarǵı Keńesiniń deputatı Axmed Reymov ózi saylanǵan aymaqtaǵı “Baǵshılıq” mákan puqaralar jıyını turǵınları menen ashıqtan-ashıq sóylesiw ótkerdi. Ushırasıw xalıqtıń turmıslıq mashqalaları hám usınısların tıńlaw, orınlarda bar máselelerdi sheshiw boyınsha ámeliy ilajlar kóriw maqsetinde shólkemlestirildi.

Máhállede bolıp ótken ushırasıwda deputat xalıqtıń turmıs dárejesin bunnan bılay da jaqsılaw, puqaralardıń mashqalaların ornında úyreniw hám olardı tiyisli shólkemler menen birgelikte sheshiw máselelerine ayrıqsha itibar qarattı. Ilaj dawamında jaslardıń bilim alıwı hám bos waqtın mazmunlı shólkemlestiriw sıyaqlı áhmiyetli máseleler boyınsha pikir alısıldı.
Xalıq tárepinen bildirilgen usınıs hám múrájatlar deputat tárepinen dizimge alındı. Ayırım máseleler boyınsha juwapkerler sol jerdiń ózinde baylanısqa shıǵıp, olardı sheshiwdiń ámeliy mexanizmleri dodalandı. Sonıń ishinde, ayırım sociallıq qorǵawǵa mútáj shańaraqlardı qollap-quwatlaw máseleleri boyınsha anıq rejelestirilgen ilajlar belgilep alındı.
A.Reymov ushırasıw juwmaǵında, deputatlıq jumıstıń eń tiykarǵı wazıypası – xalıqtıń dárti hám mashqalasına biypárwa bolmaw, olardı ornında tıńlap, sheshim tabıwǵa járdemlesiw bolıp esaplanadı. Búgingi ushırasıwda alǵa qoyılǵan barlıq máseleler álbette úyrenilip, tiyisli uyımlar menen birgelikte sheshiliwi támiyinlenedi,” – dedi ol.
Ilaj sońında máhálle belsendileri hám nuranıylar deputatqa óz minnetdarshılıǵın bildirip, bunday ushırasıwlar xalıqtıń mámleketlik hám jámiyetlik turmıstaǵı qatnasın kúsheytiwi, máhállelerde sociallıq belsendilikti arttırıwda úlken áhmiyetke iye ekenin atap ótti.

Qaraqalpaqstan xabar agentligi