“Huqıqıy málimlemeni proaktiv túrde jetkeriw sistemasınıń nátiyjeliligin bunnan bılay da arttırıw ilajları haqqında”ǵı Prezident pármanı (PP-160) qabıl etildi.

Pármanǵa bola, 2026-jıl 1-fevralǵa shekem Ózbekstan Respublikası nızamshılıq maǵlıwmatları milliy bazası – Lex.uz arqalı “proaktiv nızamshılıq” principi tiykarında huqıqıy málimlemeni “aqıllı úgit-násiyat” túrinde jetkeriwdiń tómendegi sisteması engiziledi:
– Lex.uz Salıq uyımlarınıń elektron mámleketlik xızmetler portalı hám Birden-bir interaktiv mámleketlik xızmetler portalı – my.gov.uz menen integraciyalanadı;
Nızamshılıq tarmaqlarınıń ulıwma huqıqıy klassifikatorınıń hár bir kodı Ekonomikalıq jumıs túrleriniń ulıwma mámleketlik klassifikatorınıń tiyisli toparına hám tiyisli mámleketlik xızmetke biriktiriledi;
– isbilermenlik subektleri hám ózin-ózi bánt etken shaxslardıń soliq.uz sistemasındaǵı jeke kabinetine olardıń kelisimi tiykarında Ekonomikalıq jumıs túrleri ulıwma mámleketlik klassifikatorı hám ózin-ózi bánt etken shaxslar shuǵıllanıwı múmkin bolǵan jumıs (jumıslar, xızmetler) túrleriniń dizimi tiykarında olardıń jumısına baylanıslı jańadan qabıl etilgen normativlik-huqıqıy hújjetlerdiń mazmunına baylanıslı málimleme hám usı hújjetke silteme jiberiledi;
– Birden-bir interaktiv mámleketlik xızmetler portalı paydalanıwshılarınıń jeke kabinetine olardıń kelisimi tiykarında olar tárepinen paydalanılǵan yamasa keleshekte paydalanılıwı múmkin bolǵan avtomatikalıq túrde ámelge asırılatuǵın xızmetlerdi tallaw tiykarında kúndelikli turmısta qollanıw ushın zárúr bolǵan normativlik-huqıqıy hújjetlerge siltemeler jiberiledi.
2026-jıl 1-yanvarǵa shekem Lex.uz sisteması “E-qaror” hám “E-kengash” elektron platformaları menen integraciyalanadı. Nátiyjede, jergilikli mámleketlik hákimiyat uyımları qabıl etken normativlik-huqıqıy xarakterge iye qararlar Milliy bazaǵa tikkeley jaylastırılıp barılıwı támiyinlenedi.
Pármanǵa bola, 2026-jıl 1-marttan baslap huqıqıy mádeniyattı arttırıw boyınsha ilajlardı monitoring etiw hám bahalaw sistemasınan waz keshken halda normativlik-huqıqıy hújjetlerdiń tekstlerin orınlawshılarǵa jetkeriw, olardıń mánisi hám áhmiyetin orınlawshılar hám keń xalıq qatlamına túsindiriw jumısların “Ijro.gov.uz” uyımlararalıq birden-bir elektron orınlaw tártibi sisteması arqalı qadaǵalaw tártibi jolǵa qoyıladı. Onda:
– normativlik-huqıqıy hújjetlerdiń tekstleri “Ijro.gov.uz” uyımlararalıq birden-bir elektron orınlaw tártibi sisteması hám “Sanlı máhálle” birden-bir platforması arqalı “respublika-wálayat-rayon-máhálle” principi tiykarında mámleketlik uyımlar hám shólkemlerge jáne puqaralardıń ózin-ózi basqarıw uyımlarına jiberiledi. Onda bul uyımlardıń jumısına baylanıslı hújjetler májbúriy tanısıw ushın, basqa hújjetler maǵlıwmat ushın jiberiledi;
– mámleketlik uyımlar hám shólkemler tárepinen normativlik-huqıqıy hújjetlerdiń mazmun-mánisi orınlawshılar hám keń jámiyetshilikke jetkeriliwi ústinen qadaǵalaw ornatıw maqsetinde Ádillik ministrligi tárepinen “Ijro.gov.uz” uyımlararalıq birden-bir elektron orınlaw tártibi sistemasında Huqıqıy málimlemeni tarqatıw kartotekasın júrgiziw jolǵa qoyıladı;
– Kartoteka tiykarında mámleketlik uyımlar hám shólkemler normativlik-huqıqıy hújjetlerdiń mazmun-mánisin jetkeriw boyınsha mánzilli huqıqıy úgit-násiyatlaw ilajların ámelge asıradı hám orınlanǵan jumıslar boyınsha maǵlıwmatlardı “Ijro.gov.uz” orınlaw tártibi uyımlararalıq birden-bir elektron sistemasına kirgizip baradı.

ÓzA