Usı jıldıń 10-sentyabr kúni Qaraqalpaqstan Respublikası Joqarǵı Keńesiniń gezeksiz jetinshi sessiyası bolıp ótti.
Qaraqalpaqstan Respublikası Húkimet aǵzaları, qala, rayon hákimleri, huqıq qorǵaw uyımları hám taraw basshıları, ǵalaba xabar quralları wákilleri qatnastı.

Sessiyanı Qaraqalpaqstan Respublikası Joqarǵı Keńesiniń Baslıǵı Amanbay Orınbaev kiris sóz benen ashtı hám basqarıp bardı.
Sessiyanıń kún tártibine muwapıq shólkemlestiriw máselesi, yaǵnıy «Qaraqalpaqstan Respublikası Joqarǵı Keńesi Baslıǵınıń orınbasarı tuwralı» másele kórip shıǵıldı.
Sessiyada Qaraqalpaqstan Respublikası Joqarǵı Keńesi Baslıǵınıń orınbasarı R.Saparbaev iyelep turǵan lawazımınan bosatıldı.
Qaraqalpaqstan Respublikası Joqarǵı Keńesi Baslıǵınıń orınbasarı lawazımına Qaraqalpaqstan Respublikası Joqarǵı Keńesine 47-sanlı «Sanaat» saylaw okruginen deputat Radjapbay Kupalbekovich Nurazizovtiń kandidaturası usınıs etildi.
Usınılǵan talabannıń kandidaturasın deputatlar kórip shıqtı hám qollap-quwatladı.
Qaraqalpaqstan Respublikası Konstituciyası 70-statyasınıń 4-bántine muwapıq, jasırın dawıs beriw jolı menen Radjapbay Kupalbekovich Nurazizov Qaraqalpaqstan Respublikası Joqarǵı Keńesi Baslıǵınıń orınbasarı lawazımına saylandı.
Sessiyada R. Nurazizov shıǵıp sóylep, bildirilgen isenim ushın óz minnetdarshılıǵın bildirdi.
Sessiyanıń jumısına Ózbekstan Respublikası Prezidentiniń keńesgóyi T.Xudaybergenov qatnastı hám shıǵıp sóyledi.

Qaraqalpaqstan xabar agentligi