Búgingi kúnde demografiyalıq ózgerisler sebepli xalıq arasında kekseler sanı artıp barmaqta. Turmıslıq tájiriybesi bay, aqıllı áwlad wákilleri – biziń altın ǵáziynemiz. Biraq, bul buwınnıń kópshiligi bir mashqala aldında jalǵız qalmaqta – bul sociallıq jalǵızlıq.

Jalǵızlıq insannıń eń awır ruwxıy sınaqlarınan biri. Ásirese, kekselik dáwirinde jaqınlarınıń uzaqlasıwı, kásiplik jámietshilikten sheginiw, shańaraqtaǵı baylanıslardıń tómenlewi kópshilikti qıynaydı. Bul túsinbewshilikke, qáweterge, turmıstan qanaatlanbawǵa alıp keledi. Psixologlardıń aytıwınsha, jalǵız qalǵan insan tek ruwxıy emes, al densawlıǵında da qıyınshılıqlarǵa dus keledi.

Kóbinese, pensiyaǵa shıqqan adam uzaq jıllar dawamında islegen jámáátinen ajıralıp, boslıqtı sezinedi. Balaları óz turmısı menen bánt bolıp, geyde basqa qalaǵa yamasa sırt elge ketiwi múmkin. Bunday waqıtta “men endi hesh kimge kerek emespen be?” degen oy kekselerdiń júregin uwlaydı.

Biraq, bul máseleniń de sheshimi bar. Bárinen burın, kekselerge itibar, mehir, súyispenshilik hám qatnasıq qanshelli zárúr. Hár bir shańaraq óz keksesin qádirlew, olardı tıńlaw, shın júrekten sáwbetlesiw – ruwxıy dáretiwdiń eń kúshli jolı.

Sonıń menen birge, máhálle, jámiyetlik shólkemler, psixologlar da qollap-quwatlawda áhmiyetli orın iyeleydi.

Jalǵızlıqtan qutılıwdıń nátiyjeli jolları – ulıwmalıq ilajlarǵa, toparlı shınıǵıwlarǵa, mádeniy jıynalıslarǵa tartıw. Bunday ortalıqta kekseler jámiyettiń tolıq huqıqlı aǵzası ekenin jáne bir márte sezinedi.

Sonlıqtan, kekselerdegi sociallıq jalǵızlıq – tek ǵana jeke adamnıń emes, pútkil jámiyettiń mashqalası. Kekselerimizdiń ruwxıy salamatlıǵın saqlaw jámiyettiń turaqlılıǵı ushın da ádet.

Qısqası, jalǵız qalǵan ǵarrıǵa eń zárúr nárse – kewil bóliw, sózge tartıw, qádirlew. Búgin kekselerimizge qanday itibar bersek, erteń bizge de sonday itibar qaytıp keledi.

Salamat Shamshetdinov,

Qaraqalpaqstan Respublikası Shomanay rayonı «Insan» social xızmetler orayı qánigesi