Doxada júz bergen jarılıw XAMAStıń joqarı mártebeli hámeldarları hám Palestina rásmiylerine qastıyanlıq ekeni aytılmaqta. Bul óz-ara oq atıwdı toqtatıw boyınsha sóylesiwlerde tiykarǵı dáldalshı, regiondaǵı eń iri AQSh áskeriy bólimi Al-Udayd hawa bazası jaylasqan mámleket – Qatarǵa Izrail tárepinen berilgen dáslepki sonday hújim bolıp esaplanadı.

Izrail Gaza, Livan, Yemen hám Siriyanı bombalap, Palestinadaǵı basıp alınǵan Batıs Jaǵısqa derlik hár kúni top atpaqta. Xamastaǵı derek “Al-Jazira” telekanalına málim etiwinshe, bul ret qarama-qarsı táreptiń sóylesiwshiler toparı nıshanaǵa alınǵan. Olar AQShtıń sońǵı kelisim usınısın dodalaw ushın jıynalıp atırǵan waqıtta hújim júz bergen.
Qatar Sırtqı isler ministrliginiń wákili Majid Al-Ansoriydiń bildiriwinde mámleket XAMAS siyasiy byurosınıń bir neshe aǵzası jasaytuǵın turaq jay obekti nıshanaǵa alınǵan bul háreketti “keskin qaralaydı”. Imaratta topar basshılarınan keminde bes adam bolǵan, dep xabar bergen “Al-Hadath” telekanalı. Tiyisli derekler xabarshıǵa Izrail hújimi waqtında Gaza sektorındaǵı Xamas jetekshisi, sóylesiw toparınıń basshısı Xalil Al-Xayya, hárekettiń sırt eldegi wákilxanasınıń basshısı Xolid Mashal, Batıs Jaǵıstaǵı aerodrom sárkardası Zohir Jabarin hám siyasiy byuro aǵzası Nizar Audolloh qaytıs bolǵanın tastıyıqlaǵan. Hújim waqtında basqarmanıń jáne bir aǵzası Ǵozi Xamad ta imaratta bolǵan, biraq onıń táǵdiri házirshe belgisiz.
Xamas bul xabarlarǵa rásmiy túsinik bermegen. Aldınıraq Izrail armiyası baspasóz xızmeti Xamas joqarı basshılıǵına anıq soqqı berilgenin járiyalaǵan, biraq ámeliyat anıq qay jerde orınlanǵanına anıqlıq kirgizbegen edi.
Qatar rásmiyleri Izraildı ayıplap, ápiwayı xalıq qáwip astında qalǵanına itibar qaratqan. Izrail bolsa Qatar paytaxtına soqqı bergenin ele rásmiy túrde tastıyıqlamadı.

M.Pirmatova, ÓzA