Búgin Ózbekstan Liberal-demokratiyalıq partiyası Siyasiy Keńesi Atqarıw komitetinde Túrkiyanıń “Ádillik hám rawajlanıw” partiyası baslıǵınıń orınbasarı Z.Sirakaya basshılıǵındaǵı delegaciya wákilleri menen ushırasıw bolıp ótti.

Ushırasıwda Isbilermenler háreketi – Ózbekstan Liberal-demokratiyalıq partiyası Siyasiy Keńesi Atqarıw komitetiniń baslıǵı A.Haitov eki mámleket arasındaǵı qatnasıqlar izbe-iz rawajlanıp atırǵanı, Túrkiya Ózbekstan ǵárezsizligin birinshi bolıp tán alǵanı, usı tariyxıy waqıyadan berli Túrkiya hám Ózbekstan arasındaǵı doslıq baylanıslar barlıq baǵdarlarda keńnen rawajlanıp atırǵanın atap ótti:
– Ásirese, sońǵı segiz jıl ishinde Ózbekstan – Túrkiya qatnasıqları pútkilley jańa sapa dárejesine shıqtı. Mámleketimizde túrk birge islesiwshiler menen birgelikte 100 den aslam birgeliktegi joybarlar nátiyjeli ámelge asırılmaqta. Sonday-aq, ulıwma bahası 10 milliard dollar bolǵan perspektivalı joybarlar portfeli qáliplestirilgeni, óz-ara sawda kólemi barǵan sayın artıp atırǵanı da buǵan ayqın mısal boladı. Qalaberdi, eki mámlekettiń xalıqaralıq strukturalar sheńberindegi jumısı, atap aytqanda, Túrkiy mámleketler shólkemi sheńberindegi nátiyjeli jumısı eki xalıqtı bir-birine jaqınlastırıwǵa xızmet etpekte. Ózbekstan Prezidenti Shavkat Mirziyoev hám Túrkiya Prezidenti Rejep Tayyip Erdoǵan arasındaǵı óz-ara isenimge tiykarlanǵan qatnasıqlar Ózbekstan hám Túrkiya arasındaǵı birge islesiwdiń barlıq baǵdarlarında jedel rawajlanıp barıwına bekkem tiykar jaratpaqta,-dedi partiya jetekshisi.
Óz gezeginde, Túrkiyanıń “Ádillik hám rawajlanıw” partiyası baslıǵınıń orınbasarları Z.Sirakaya hám K.Zorlu Ózbekstandaǵı reformalardı tán aldı. Ózbekstan menen qatnasıqlar Túrkiya xalıqaralıq qatnasıqlarında bárqulla áhmiyetli orın iyelep kelgenin, bul Ózbekstannıń Oraylıq Aziyada jaylasqan ózine tán ornı menen ǵana emes, al eki xalıqtı júz jıllar dawamında birlestirip turǵan tariyxı menen de baylanıslı ekenin atap ótti.
Ushırasıwda eki tárepleme birge islesiw hám jaqınlıq baǵdarındaǵı háreketlerge Ózbekstan hám Túrkiya jetekshi siyasiy kúshleri de óz úlesin qosıwı maqsetke muwapıq ekenligine itibar qaratıldı. Usı maqsette partiyalararalıq baylanıslardı bekkemlew ayrıqsha áhmiyetke iye ekeni atap ótildi. Hár eki partiyanıń xalıqtıń abadanlıǵın arttırıw, mámleketlerdiń jámiyetlik-siyasiy, ekonomikalıq rawajlanıwın támiyinlew jolındaǵı háreketleri bir-birine únles ekenligi, olardı ámelge asırıwda xalıqaralıq birge islesiw mexanizmlerin iske qosıw hár eki tárep ushın da paydalı ekeni atap ótildi.
Ushırasıw juwmaǵında eki tárep arasındaǵı birge islesiwdi jáne de bekkemlew hám oǵan anıq mazmun baǵıshlaw maqsetinde óz-ara birge islesiw haqqındaǵı Memorandumǵa qol qoyıldı.
Bul hújjet sheńberinde óz-ara tájiriybe almasıw, eki mámleket parlamentleri hám jergilikli wákillikli uyımlardaǵı partiya deputatlıq toparları arasında, jaslar hám hayal-qızlar qanatları jáne eki partiyanıń tallaw orayları arasında birge islesiw qatnasıqların ornatıw máseleleri názerde tutılǵan.
Ushırasıw sońında partiyalararalıq birge islesiw xalıqlarımız arasındaǵı doslıqtı, óz-ara baylanıslardı bunnan bılay da bekkemleytuǵınına isenim bildirildi.
Kún dawamında Túrkiya “Ádillik hám rawajlanıw” partiyası delegaciyasınıń wákilleri Tashkenttegi “Túrk Ortaokulu ve Lisesi”ne barıp, onıń jumısı menen tanısıwı hám parlamenttiń eki palatasında ushırasıwlar ótkeriwi rejelestirilgen.

Muhtarama Komilova,
Rustam NAZARMATOV (súwret), ÓzA