Kúni keshe Prezidentimiz mektepten tısqarı bilimlendiriwdi jańa basqıshqa alıp shıǵıw, oqıwshılardıń bos waqtın mazmunlı ótkeriw boyınsha qararǵa qol qoydı.

Orınlardaǵı 219 “Bárkamal áwlad” mektebi, “Yoshlik” sport jámiyeti, Oqıwshı jaslar orayı hám Ózbekstan balalar shólkemi negizinde respublika, aymaq hám rayonlarda “Keleshek” orayları shólkemlestiriledi.
“Keleshek” orayları mektepler menen úzliksiz hám maqsetli ilajlardı janlandırıp, injenerlik, ilim, mádeniyat, kórkem óner, kitapqumarlıq, sport hám ekologiya baǵdarları boyınsha oqıwshılardı dógereklerge tartadı.
Bul sistema menen barlıq mektepler qamtıp alınatuǵını atap ótildi. Hár bir orta mektepte másláhátshi lawazımı engiziledi. Másláhátshiler oqıwshılardıń qábileti hám qızıǵıwshılıǵına qarap, til, kásip, injenerlik, dóretiwshilik, kórkem óner hám sport dógereklerin shólkemlestiredi.
Ruwxıy-aǵartıwshılıq isleri boyınsha direktor orınbasarları klass basshısı, mektep psixologi menen minez-qulqında unamsız ózgeris bolǵan oqıwshılardıń bilimlendiriw hám shańaraqtaǵı mashqalaların úyrenip, olardı jeńip ótiwge járdemlesedi.
Máhálledegi jaslar jetekshileri bolsa oqıwshılardıń mektepten tısqarı waqtın mazmunlı ótkeriwi ushın juwapker boladı.
Eń tiykarǵısı, endi mekteplerde oqıwshılardıń dógereklerde, sport, volontyorlıq hám olimpiadalarda erisken nátiyjeleri boyınsha “sanlı portfeli” qáliplestirilip, elektron sertifikatta kórsetiledi.

ÓzA