Házirgi waqıtta Oliy Majlis Nızamshılıq palatasınıń gezektegi májilisi bolıp ótpekte. Onda deputatlar Ózbekstan Respublikası Mámleketlik byudjetiniń hám mámleketlik maqsetli qorlar byudjetleriniń 2025-jıldıń birinshi yarım jıllıǵındaǵı orınlanıwı haqqındaǵı esabattı kórip shıqpaqta.

Bul másele boyınsha Ózbekstan Respublikası Bas ministriniń orınbasarı – Ekonomika hám qarjı ministri J.Qwchqorov bayanat jasamaqta.
Ministr óz esabatında dúnya ekonomikasındaǵı ózgeriwsheńlik hám joqarı anıqsızlıq sharayatında, aymaqlarda xalıqtıń bántligi hám isbilermenlikti rawajlandırıw boyınsha ilajlar hám ámelge asırılıp atırǵan reformalar nátiyjesinde jalpı ishki ónimniń kólemi ótken jıldıń usı dáwirine salıstırǵanda 7,2 procent, sanaat ónimlerin islep shıǵarıw 6,6 procent, bazar xızmetleri 13,3 procent, qurılıs jumısları 10,7 procent hám awıl xojalıǵı ónimlerin jetistiriw 4,0 procentke artqanın atap ótti.
Atap ótilgenindey, tiykarǵı kapitalǵa ózlestirilgen investiciyalardıń kólemi 273,4 trillion sumdı qurap, ótken jıldıń sáykes dáwirine salıstırǵanda 5,5 procentke óskeni mámleketimizde turaqlı ekonomikalıq ósiw processleri dawam etip atırǵanın kórsetpekte. Bul bolsa, óz gezeginde, xalıqtıń real dáramatları 9,5 procentke artıp, xalıqtıń abadanlıǵın támiyinlewde úlken áhmiyetke iye bolmaqta.
Usı jıldıń birinshi yarım jıllıǵında mámlekettiń sırtqı sawda aylanısı 37,0 mlrd. dollardı qurap, ótken jıldıń sáykes dáwirine salıstırǵanda 16,1 procentke artqan.
Esap beriw dáwirinde Mámleketlik byudjet dáramatları 103,4 procentke orınlanǵan. Qárejetler boyınsha reje kórsetkishleri 96,8 procentti quraǵan. Bul byudjet turaqlılıǵı támiyinlengeninen dárek bermekte.
Esabatta atap ótilgenindey, 2025-jıldıń birinshi yarım jıllıǵında Mámleketlik byudjet dáramatları 144,2 trln. sumdı qurap, 2024-jıldıń sáykes dáwirine salıstırǵanda 19,2 procentke artqan hám derlik barlıq salıq túrleri boyınsha belgilengen reje kórsetkishleri tolıq orınlanǵan. Mámleketlik byudjettiń qárejetleri bolsa esap beriw dáwirinde 173,3 trln. sumdı qurap, 2024-jıldıń sáykes dáwirine salıstırǵanda 16,0 procentke ósken. Onda sociallıq turaqlılıqtı támiyinlew, xalıqtıń turmıs dárejesin arttırıw hám puqaralar ushın múnásip sharayatlar jaratıw mámleketlik qarjı siyasatınıń tiykarǵı baǵdarlarınan biri sıpatında saqlanıp qalıp atırǵanı deputatlar tárepinen ayrıqsha atap ótildi.
Atap aytqanda, usı jıldıń birinshi yarım jıllıǵında sociallıq qárejetler ushın Mámleketlik byudjetten 86,2 trln. sum yamasa 2024-jıldıń sáykes dáwirine salıstırǵanda 12,1 trln. sumǵa kóp qarjı qaratılǵan. Bul bolsa jámi qárejetlerdiń 49,8 procentin quraydı. Bul qarjılardıń kópshiligi bilimlendiriw tarawına qaratıldı. Sonıń ishinde, mektepke shekemgi bilimlendiriw tarawına baǵdarlanǵan qarjılardıń kólemi 7,17 trillion sumǵa jetti. Mámleketlik emes MShBSh lardı rawajlandırıw maqsetlerine 1,8 trln. sum subsidiya ajıratıldı. Mektepke shekemgi bilimlendiriw jasındaǵı balalardıń 77 procenti MShBSh ǵa qamtıp alındı.
Magistratura basqıshında oqıp atırǵan 7 mıńǵa shamalas qızlardıń 47,5 mlrd. sumlıq kontrakt pulları tólep berildi. Sonday-aq, bakalavr basqıshındaǵı 7,6 mıńǵa shamalas hayal-qızlardıń kontrakt tólemleri ushın 81 mlrd. sumlıq tálim kreditleri ajıratıldı.
Májilis óz jumısın dawam ettirmekte.

ÓzA