Paytaxtımızdaǵı Olimpiya stadionında “CAFA Nations Cup” turniriniń final oyını bolıp ótti. Onı Prezident Shavkat Mirziyoev barıp kórdi.

Finalda Ózbekstan hám Iran milliy saylandı komandaları bellesti. Tiykarǵı waqıtta gol urılmaǵanı ushın, qosımsha taymlar belgilendi. Olar da teńbe-teń bolıp, oyın penaltiler seriyasına qaray baratırǵan waqıtta Ózbekstan jeńis golin kirgizdi. 120-minutta qanattan asırılǵan toptı Hojiakbar Alijonov bası menen qarsılas dárwazasına jolladı.
Usı tárizde Ózbekstan milliy saylandı komandası 2025-jılǵı “CAFA Nations Cup” jeńimpazı boldı.
Jeńimpaz futbolshılarımızǵa altın medal hám kubokti Prezidentimiz Shavkat Mirziyoev tapsırdı. Sıylıqlaw máresiminde FIFA basshısı Djanni Infantino hám basqa da rásmiy shaxslar qatnastı.
Bul kubok oyınları jáhán chempionatına shıqqan futbolshılarımız ushın jaqsı tayarlıq wazıypasın atqaradı. Jáne bir quwanıshlı tárepi, milliy saylandı komandamızdıń Iranǵa qarsı 13 jıllıq jeńissiz seriyasına juwmaq jasaldı. 2023-jılı ótkerilgen bunday dáslepki jarısta da Ózbekstan finalda Iranǵa 0:1 esabında jeńilgen edi.
CAFA – Oraylıq Aziya futbol associaciyası. CAFA kubogi hár eki jılda ótkeriledi. Bıyılǵı jarısta, sonday-aq, Awǵanstan, Qırǵızstan, Tájikstan, Túrkmenstan, Hindstan, Oman saylandı komandaları qatnastı.
Bul jarıs jaqında qurıp pitkerilgen Olimpiada qalashasında ótkerilgen dáslepki xalıqaralıq turnir bolıp, mámleketimiz sportshıları ushın jeńis penen baslandı. Onda rámziy mánis hám jaqsı tilekler payda boldı. Bunday stadionlar, sportqa qaratılıp atırǵan itibar elimizge bárqulla jeńisler alıp kele bersin.

ÓzA