Ózbekstan Respublikası Prezidenti Shavkat Mirziyoev Xalıqaralıq futbol associaciyaları federaciyası (FIFA) basshısı Djanni Infantinonı qabılladı.

Sóylesiw aldınan FIFA prezidenti Ózbekstan jetekshisi hám xalqın tariyxıy waqıya – milliy saylandı komandamız 2026-jılı AQShta bolıp ótetuǵın futbol boyınsha jáhán chempionatınıń final basqıshına jollamanı qolǵa kirgizgeni menen jáne bir márte qızǵın qutlıqladı. Bul haqılı túrdegi jetiskenlik mámleketimizde alıp barılıp atırǵan nátiyjeli reformalar, sporttı rawajlandırıwǵa qaratılıp atırǵan itibar hám hár tárepleme járdemniń ámeliy nátiyjesi ekeni atap ótildi.
Ózbekstannıń bul abıraylı xalıqaralıq struktura menen, bárinen burın, futboldı shólkemlestiriw hám basqarıw sistemasın jetilistiriw, jas qábiletlerdi júzege shıǵarıwǵa járdemlesiw, trenerler, tóreshiler, menedjerler, sport shıpakerleri hám texnikalıq qánigelerdi xalıqaralıq dárejede tayarlaw baǵdarındaǵı nátiyjeli birge islesiwin bunnan bılay da keńeytiw máseleleri dodalandı.
Futboldı, birinshi gezekte, jaslar arasında ǵalaba en jaydırıw boyınsha birgeliktegi baǵdarlamalardı ámelge asırıwda tıǵız birge islesip atırǵanı úlken qanaatlanıwshılıq penen atap ótildi.
FIFAnıń texnikalıq járdeminde zamanagóy Milliy futbol orayı, sonıń ishinde, innovaciyalıq sheshimlerdi engizgen halda sanlı futbol boyınsha situaciyalıq oray shólkemlestirildi.
Ótken jılı elimizde futzal boyınsha jáhán chempionatı tabıslı ótkerildi.
Ózbekstanda FIFAnıń iri jarısları hám ilajların shólkemlestiriwge ayrıqsha itibar qaratıldı.
Tashkent qalasında FIFAnıń Oraylıq Aziya mámleketleri ushın regionallıq wákilxanasın ashıw boyınsha kelisimge erisildi.
Ushırasıw juwmaǵında Ózbekstan Prezidenti ózbek futbolın rawajlandırıw hám xalıqaralıq maydanda alǵa qoyıwǵa qosqan jeke úlesi ushın FIFA basshısı Djanni Infantinoǵa mámleketimizdiń joqarı sıylıǵı – “Dwstlik” ordenin tapsırdı.

ÓzA