Burın xabar bergenimizdey, FIFA prezidenti Janni Infantino basshılıǵındaǵı delegaciya aǵzaları paytaxtımızda bolıp tur.

Delegaciya aǵzaları kún dawamında “Olimpiya qalashası” hám Joqarı Shırshıqtaǵı Milliy futbol orayınıń jumısı menen tanıstı.
Joqarı mártebeli miymanlarǵa Ózbekstan Respublikası sport ministri Adham Ikromov, Aziya olimpiada keńesiniń vice-prezidenti, Milliy olimpiada komiteti baslıǵınıń birinshi orınbasarı Otabek Umarov, Ózbekstan futbol associaciyasınıń birinshi vice-prezidenti Ravshan Ermatov basshılıq etti.
2022-jıl 9-noyabrde qurılısı baslanǵan “Olimpiya qalashası” elimizdegi eń iri sport komplekslerinen biri bolıp, 100 gektardan aslam maydanda boy tiklegen. Onda bir neshe sport túrleri ushın mólsherlengen zamanagóy, kóp funkciyalı imaratlar qurılǵan.
Kompleks xalıqaralıq kriteriyalarǵa tolıq juwap beriwi, arxitekturalıq jaqtan jetikligi, energiyanı únemlewi hám zamanagóy innovaciyalıq sheshimleri menen ayrıqsha áhmiyetke iye.
Janni Infantino “Olimpiya qalashası”na da joqarı baha berdi. Ol Ózbekstanda sport tarawında ámelge asırılıp atırǵan reformalar, jaratılıp atırǵan zamanagóy sport sharayatları hám jaslar ushın imkaniyatlardı tán aldı.
Bunnan soń, delegaciya aǵzaları Joqarı Shırshıqtaǵı Milliy futbol orayına bardı.
Bizge belgili, eki jıl aldın Janni Infantino bul aymaqqa kelip, oraydıń qurılısınıń simvolikalıq gerbishin qoyǵan edi. Búgingi kúnde oray tolıq iske qosılıp, bir waqıttıń ózinde bir neshe saylandı komanda shınıǵıw ótkeriwi ushın barlıq sharayat jaratılǵan. Zamanagóy stadionlar, sport zalları, oqıw imaratları hám miymanxana futbolshılardıń ıqtıyarında.
Sonday-aq, sport medicinası orayı zamanagóy úskeneler menen támiyinlengen bolıp, futbolshılardıń jaraqatlardan keyin qısqa waqıt ishinde tikleniwi ushın reabilitaciya bólimleri, basseyn hám shınıǵıw zalları jumıs alıp barmaqta. Delegaciya aǵzaları futbol qánigelerin tayarlaw hám ilimiy-izertlew orayı, VAR sisteması, saylandı komandalar tayarlaw maydanı hám Respublikalıq futbol akademiyası menen tanıstı.
Ózbekstan futbol associaciyasınıń xabarına bola, Janni Infantino Ózbekstan milliy saylandı komandası aǵzaları menen ushırasıp, olardı Jáhán chempionatına jollama menen qutlıqladı.
Esletip ótemiz, Janni Infantino basshılıǵındaǵı delegaciya “CAFA Nations Cup – 2025” jarısınıń Ózbekstan hám Iran saylandı komandaları arasındaǵı final oyının stadionnan tamashalawdı rejelestirgen.

Javohir Toshxwjaev, ÓzA