“Respublikada kartoshka jetistiriwdi kóbeytiw hám tuqımgershilikti bunnan bılay da rawajlandırıwǵa baylanıslı qosımsha ilajlar haqqında”ǵı Prezident qararı qabıl etildi.

Qararǵa bola, 2028-jıldan hár jılı ónimdarlıq dárejesi 85 procentten tómen bolmaǵan keminde 10 million dana kartoshkanıń mini-túyneklerin jetkerip beriw, 2030-jılǵa barıp respublikada kartoshkanıń ortasha ónimdarlıǵın 16-17 tonnadan 25-30 tonnaǵa shekem arttırıw respublikada kartoshka jetistiriwdi kóbeytiw hám tuqımgershilikti rawajlandırıwdıń tiykarǵı maqsetli kórsetkishleri etip belgilendi.
Awıl xojalıǵı ministrligi hár jılı 1-dekabrge shekem keyingi jılda jetistiriletuǵın kartoshkanıń “in-vitro” ósimlikleri, mikro hám mini-túynekleriniń kólemleri boyınsha ilimiy mákemeler hám isbilermenlerge buyırtpa beredi.
2026-jıl 1-yanvardan Awıl xojalıǵın mámleket tárepinen qollap-quwatlaw qorı esabınan kommerciyalıq bankler arqalı kartoshka jetistiriw qárejetlerin qarjılandırıw ushın ónim bahasınıń 50 procentine shekem jıllıq 12 procent stavkada 6 aylıq jeńilletilgen dáwir menen 12 ay múddetke qamsızlandırıw polisi tiykarında kreditler ajıratıladı.
Sonday-aq, 2026-jıl 1-yanvardan kartoshka jetistiriwshiler tárepinen quyash panellerin ornatıw qárejetleriniń 50 procentine shekem, biraq 50 million sumnan artıq bolmaǵan bólegi Mámleketlik byudjetten qaplap beriledi.

ÓzA