Bul haqqında Energetika ministrligi málimleme xızmeti xabar berdi. Onda atap ótiliwinshe, kúni keshe Awǵanstannıń Qabul qalasında energetika tarawına investiciyalardı tartıw hám mámlekettiń energetika sektorın qollap-quwatlawǵa baǵıshlanǵan birinshi xalıqaralıq konferenciya bolıp ótti.

Ilajda Awǵanstan húkimeti wákilleri, Ózbekstan, Túrkmenstan hám Tájikstan Respublikaları energetika ministrlikleri delegaciyaları, sonday-aq, bir qatar xalıqaralıq shólkemler hám diplomatiyalıq wákilxanalardıń wákilleri qatnastı.
Onda tárepler óz-ara birge islesiw qatnasıqların bunnan bılay da bekkemlew ilajları haqqında sóz etti.
Ánjuman sheńberinde Awǵanstanda 220-500 kV kernewli elektr uzatıw tarmaqları hám podstanciyalar qurılısı boyınsha finanslıq shártnamaǵa qol qoyıldı hám joybardıń ámeliy basqıshına start berildi.
Atap ótilgenindey, joybarlar 2027-jıldıń birinshi sheregine shekem ámelge asırılıwı názerde tutılǵan bolıp, bul Ózbekstan hám Awǵanstan arasında elektr energetikası baǵdarındaǵı birge islesiwdi jáne de bekkemleydi.
Sonday-aq, Ózbekstan Awǵanstan boylap bólistiriw tarmaqların modernizaciyalaw, aqıllı esaplaw sistemaların engiziw, tarawda nátiyjelilik hám ashıq-aydınlıqtı arttırıw jáne texnikalıq ekspertiza arqalı isenimli energiya jetkerip beriwdi támiyinlew sıyaqlı baǵdarlarda birge islesiw keńeytiledi.
Ushırasıw juwmaqları sonı kórsetedi, bul ánjuman tek ǵana Awǵanstan ekonomikasın rawajlandırıw emes, al pútkil regionda turaqlı energiya infrastrukturasın qáliplestiriwde áhmiyetli qádem bolıp esaplanadı.

N.Ziyodullaeva tayarladı, ÓzA