Múnásibet

Búgin mámleketimiz sırtqı siyasatta ashıq, jedel hám konstruktivlik sóylesiw jolınan barmaqta. Bunday siyasat keyingi jıllarda dúnya mámleketleri menen birge islesiwde jańa bet ashtı.
Bul process Shanxay birge islesiw shólkemi Mámleket basshıları keńesiniń májilisi hám “ShBSh plyus” sammitinde Prezidentimiz alǵa qoyǵan baslama hám usınıslarda jáne bir márte óz kórinisin taptı.
Xalıqaralıq ekspertler Prezident Shavkat Mirziyoevtiń Qıtay Xalıq Respublikası Baslıǵı Si Czinpin menen sóylesiwlerinde erisilgen kelisimlerdi joqarı bahalamaqta.
Usı múnásibet penen Qıtay Xalıq Respublikasınıń elimizdegi Ayrıqsha hám tolıq huqıqlı elshisi Yuy Czyun menen sáwbetlestik.
– Ózbekstan ǵárezsizlikke eriskennen berli milliy ózgesheliklerge say rawajlanıw jolın tańladı. Prezident Shavkat Mirziyoevtiń aqılǵa uǵras basshılıǵı astında Jańa Ózbekstandı qurıwǵa qaratılǵan reformalardıń jańa basqıshı baslandı. “Ózbekstan – 2030” strategiyası izbe-iz ámelge asırılmaqta. Siyasiy, sociallıq hám ekonomikalıq tarawlarda keń kólemli reformalar alıp barılmaqta hám olar sezilerli nátiyjeler bermekte.
Búgingi Ózbekstan ápsanaǵa aylanǵan Xumay qusı sıyaqlı qanat jayıp, biyiklerge kóterilmekte. Ullı jipek jolı civilizaciyasınıń besigi bolǵan bul úlken mámleket zamanagóy kóriniske iye bolmaqta. Mámleket ekonomikası jedel pátler menen rawajlanbaqta. Jalpı ishki ónimniń ósiwi tek ǵana Oraylıq Aziyada emes, al Evroaziya regionında da eń joqarı kórsetkishlerden biri bolıp qalmaqta.
Sociallıq tarawda da turaqlı rawajlanıw baqlanbaqta. Kámbaǵallıqqa qarsı gúres óz nátiyjesin bermekte. Keyingi jılları Ózbekstan dúnya mámleketleri menen doslıq baylanısların jedel rawajlandırıp atırǵanın atap ótiw kerek. Onıń regionallıq hám xalıqaralıq abırayı barǵan sayın artıp barmaqta. Qaysı mámlekettiń elshisi menen sóylesseńiz, olardıń barlıǵı prezidentińizdiń Oraylıq Aziya mámleketleri awızbirshiligin bekkemlew hám regionnıń turaqlı rawajlanıwına qosıp atırǵan tariyxıy úlesin ayrıqsha atap ótedi.
Ózbekstan BMSh, ShBSh hám basqa da kóp tárepleme platformalarda bir qatar áhmiyetli baslama hám usınıslardı alǵa qoymaqta. Olar xalıqaralıq jámiyetshilik tárepinen keńnen qollap-quwatlanıp, joqarı bahalanbaqta.
Keyingi jılları Ózbekstan hám Qıtay jetekshileri tez-tez hám qızǵın sóylesip keldi. Olardı eki jaqın dos dep ataw múmkin. Usı waqıt dawamında kóplegen jarqın hám umıtılmas waqıyalar júz berdi. Jetekshiler mámleketlerimiz qatnasıqların jańa tariyxıy basqıshqa – hár tárepleme strategiyalıq sherikliktiń jańa dáwirine kóterdi. Prezident Shavkat Mirziyoevtiń Qıtay baspasózinde basıp shıǵarılǵan maqalasın jigirma tórt saat ishinde millionlaǵan qıtaylı oqıp shıqtı. Ondaǵı tereń filosofiyalıq ideyalar hám qızǵın sezimler jámiyetshilik arasında úlken rezonans oyattı.
Qıtay Xalıq Respublikası Baslıǵı Si Czinpin 2022-jıl sentyabrde mámleketlik sapar menen Ózbekstanǵa keldi. Samarqandta bolıp ótken Shanxay birge islesiw shólkeminiń gezektegi sammitinde qatnastı. Bunday xalıqaralıq platformalardaǵı sóylesiwler de eki mámleket baylanısların bekkemlewde úlken áhmiyetke iye bolmaqta.
Ózbekstan hám Qıtay jetekshileriniń mámleketlik basqarıw máselesinde uqsas kózqaraslarǵa iye ekenin aytıw kerek. Olardıń ekewi de milliy máplerdi ústin orınǵa qoyadı. Bul jetekshilerdiń strategiyalıq basshılıǵında mámleketlerimiz arasındaǵı qatnasıqlar tariyxtaǵı eń joqarı dárejege jetti. “Bir mákan – bir jol” baslaması izbe-iz ámelge asırılmaqta. Barlıq tarawlarda birge islesiw jedel rawajlanıp, dinamikalıq ósiwdi kórsetpekte.
Qıtay kóp jıllardan berli Ózbekstannıń eń iri sawda hám investiciyalıq sherigi bolıp esaplanadı. Sawda, investiciya, energetika hám infrastruktura qurılısı menen bir qatarda “jasıl ekonomika”, mádeniyat hám zamanagóy awıl xojalıǵı tarawlarında da jańa ósiw noqatları qáliplespekte.
Eki mámleket arasında vizasız tártip kúshke kirdi. “Qıtay – Qırǵızstan – Ózbekstan” temir jol qurılısı baslandı. Qıtay kompaniyaları Ózbekstanda quyash hám samal elektr stanciyaları, shıǵındını energiyaǵa aylandırıw zavodları hám elektr energiyasın saqlaw obektleriniń qurılısında belsene qatnaspaqta.
Qıtay brendindegi elektromobiller Ózbekstanda barǵan sayın ǵalaba en jaymaqta.
Ózbekstannıń awıl xojalıǵı ónimleri, sonıń ishinde, shiye, ánar, qawın hám lobiya sıyaqlı ónimler barǵan sayın kóbirek kólemde Qıtay bazarına eksport etilmekte hám ol jerde joqarı talapqa iye.
Keyingi basqıshta mámleket basshıları erisken kelisimlerdi jáne de nátiyjeli ámelge asırıw, baslanǵan joybarlardıń turaqlı orınlanıwın támiyinlew hám jańa birgeliktegi baslamalardı alǵa qoyıw jolındaǵı háreketlerdi dawam ettiriw zárúr.
Usı jerde, Watanıńız ǵárezsizliginiń otız tórt jıllıǵı múnásibeti menen Qıtay xalqı hám mámleketi atınan Ózbekstan xalqına eń qızǵın qutlıqlawlarımdı bildirmekshimen. Shın kewlimnen elińizge rawajlanıw, tınıshlıq hám abadanlıq tileymen. Prezidentińizdiń basshılıǵında Jańa Ózbekstan arzıw-niyetleriniń tabıslı ámelge asıwın tileymen. Mámleketlerimiz qatnasıqları jáne de rawajlanıp, birge islesiwimiz jańa nátiyjelerge erisiwin niyet etemen.

ÓzA xabarshısı
Ikrom AVVALBOEV jazıp aldı.