Ózbekstan Oliy Majlisi Senatına Vengriya Milliy májilisi Baslıǵınıń orınbasarı Ishtvan Yakov basshılıǵındaǵı parlament delegaciyası keldi.

Senat Baslıǵı Tanzila Norboeva menen ushırasıwda Ózbekstan hám Vengriya arasındaǵı qatnasıqlar keyingi jılları jańa basqıshqa kóterilgeni, eki mámleket arasında strategiyalıq sheriklik hám isenimge tiykarlanǵan nátiyjeli birge islesiw rawajlanıp atırǵanı atap ótildi.
Sawda-ekonomikalıq baylanıslardı bunnan bılay da keńeytiw, awıl xojalıǵı, avtomobil qurılısı, qurılıs, ilim, bilimlendiriw, innovaciyalar hám turizm tarawlarında birge islesiwdi tereńlestiriw máseleleri dodalandı.
Transport hám logistika sistemasın rawajlandırıw, awıl xojalıǵı tarawında birgeliktegi baslamalardı ámelge asırıw, investiciyalıq birge islesiw hám óz-ara tovar almasıw kólemin arttırıw zárúrligine ayrıqsha itibar qaratıldı.
Turizm tarawındaǵı birge islesiw perspektivaları, sonıń ishinde, eki mámleket arasında tikkeley aviaqatnawlardı jolǵa qoyıw imkaniyatları kórip shıǵıldı.
Óz-ara sóylesiwde ilimiy mákemeler arasındaǵı sheriklikti rawajlandırıw, professor-oqıtıwshılar hám jas ilimpazlar arasında tájiriybe almasıw boyınsha baslamalardı qollap-quwatlaw áhmiyetli ekenligi atap ótildi.
Parlamentleraralıq baylanıslardı bekkemlew áhmiyetli baǵdarlardan biri sıpatında atap ótildi. Nızam shıǵarıwshı uyımlar arasındaǵı turaqlı sóylesiw hám delegaciyalardıń almasıwı mámleketler arasındaǵı óz-ara isenimdi bekkemlewge jáne eki tárepleme qatnasıqlardı turaqlı rawajlandırıwǵa xızmet etip atırǵanı atap ótildi.
Tárepler nızam dóretiwshiligi tarawında tájiriybe almasıw, birgeliktegi joybarlarda qatnasıw hám parlamentleraralıq sóylesiwdi mazmunı jaǵınan bayıtıwdan mápdar ekenin bildirdi.
Ushırasıw juwmaǵında Ózbekstan hám Vengriya parlamentleri arasındaǵı birge islesiwdi jáne de rawajlandırıw maqsetinde parlamentleraralıq doslıq toparlarınıń jumısın jedellestiriw boyınsha kelisimge erisildi.

N.Abduraimova, ÓzA