Oraylıq Aziya mámleketleri arasında energetika tarawındaǵı birge islesiw barǵan sayın bekkemlenip, regionallıq turaqlılıq hám ekonomikalıq rawajlanıw ushın áhmiyetli faktorǵa aylanbaqta.

Regiondaǵı elektr energetika sistemasın nátiyjeli basqarıw, túrles tarmaqlardı birlestiriw hám elektr energiyası támiynatında turaqlılıqtı támiyinlew maqsetinde turaqlı ushırasıwlar ótkerilip kelinbekte. Usı processtiń logikalıq dawamı sıpatında bıyıl 4-5-sentyabr kúnleri Qırǵızstannıń Sholpan-Ata qalasında Oraylıq Aziya elektr energetikası muwapıqlastırıwshı keńesiniń 44-májilisi hám muwapıqlastırıwshı komissiyanıń 46-májilisi bolıp ótti.
Onda Ózbekstan, Tájikstan, Qazaqstan hám Qırǵızstannan energetika shólkemleriniń juwapkerleri, qánigeler qatnastı. Rossiya Federaciyasınıń energetika shólkemleriniń wákilleri bolsa ilajda baqlawshı sıpatında qatnastı.
Ilajda energetika qáwipsizligin támiyinlew, birden-bir elektr bazarın qáliplestiriw, qayta tikleniwshi energiya dáreklerin engiziw hám transshegaralıq birge islesiwdi keńeytiw máseleleri dodalandı.
Májiliste “Ózbekstan milliy elektr tarmaqları” akcionerlik jámiyetiniń basqarma baslıǵı Dadajon Isaqulov mámleketimizde ámelge asırılǵan reformalar hám tiykarǵı baǵdarlarǵa toqtap ótip, elektr energetika tarmaǵındaǵı jańalanıwlar hám keleshektegi rejeler haqqında maǵlıwmat berdi.
Onıń atap ótiwinshe, jańa elektr stanciyaların qurıw, bar quwatlıqlardı rekonstrukciyalaw hám qayta tiklenetuǵın energiya dáreklerin rawajlandırıw jumısları tek ǵana milliy sistema emes, al pútkil Oraylıq Aziyada turaqlılıqqa xızmet etedi. Sonıń menen birge, ol regiondaǵı mámleketler menen óz-ara paydalı birge islesiw baylanısların bunnan bılay da keńeytiwge tayar ekenin bildirdi.
Jámiyet málimleme xızmetiniń xabarına bola, Sholpan-Atada ótken bul májilis Oraylıq Aziya mámleketleriniń energetika tarawındaǵı awızbirshiligin kúsheytiw jolında áhmiyetli qádem boldı.
Regionallıq energetika sistemasın rawajlandırıw hám ulıwma máplerge xızmet etetuǵın birgeliktegi baslamalardı ámelge asırıw keleshekte turaqlı rawajlanıwdıń tiykarǵı faktorı bolıp qalatuǵını anıq.

N.Ziyodullaeva,
ÓzA