– Jer silkiniwinen keyingi izlew-qutqarıw ámeliyatı juwmaqlandı, – dedi Awǵanstannıń Kunar wálayatınıń hákimi Qudratulloh Abu Hamza “Al Jazeera” telekanalına bergen intervyuinde. – 2204 adam qaytıs bolǵanı, 4000 ǵa shamalas adam jaraqatlanǵanı atap ótildi.

Aldınraq Xalıqaralıq Qızıl atanaq hám Qızıl yarım ay jámiyetleri federaciyasınıń Awǵanstandaǵı toparınıń basshısı Joy Singxal “RIA Novosti” xabarshısına qurbanlar sanı ósiwde dawam etetuǵının, qayta silkiniw jáne jollardı búldirgeni, qulaw keltirip shıǵarǵanı, aqıbetinde qutqarıw jumısları qıyınlasıp atırǵanın aytqan edi.
Avgust ayınıń sońǵı kúni, keshqurın Awǵanstannıń shıǵısında 6 magnitudalı jer silkiniw júz berdi. Soń silkiniw bir neshe márte tákirarlandı. Tábiyǵıy apatshılıq Kunar, Laǵman hám Nangarxar wálayatları xalqına kóp táshiwish alıp keldi. Onlaǵan awıllar búlindi. Mámlekettiń kóp jıllıq urıs, kámbaǵallıq hám qıyın tábiyǵıy sharayat sebepli álle qashan ázzilegen densawlıqtı saqlaw sistemasına gezektegi apatshılıq qosımsha awır júk boldı.

ÓzA