Oraylıq Aziyada energetika tarawındaǵı birge islesiw hám turaqlılıqtı támiyinlew jolında bir qatar áhmiyetli jumıslar ámelge asırılmaqta. Qırǵız Respublikasınıń Sholpan-Ata qalasında regiondaǵı elektr energetika shólkemleriniń wákilleriniń qatnasıwında bolıp ótip atırǵan jumısshı tártiptegi májilis te bul baǵdarda úlken áhmiyetke iye.

Jumısshı tártiptegi máselelerge baǵıshlanǵan dáslepki májiliste Ózbekstan, Tájikstan, Qazaqstan hám Qırǵızstannan energetika shólkemleriniń qánigeleri qatnastı. Rossiya Federaciyasınıń energetika shólkemleriniń wákilleri bolsa ilajda baqlawshı sıpatında qatnastı.
Qırǵız Respublikasınıń “Milliy elektr tarmaqları” kompaniyası basshılıq etip atırǵan bul ilajda 2025-2026-jıldıń gúzgi-qısqı máwsiminde Oraylıq Aziya elektr energetika aylanba sistemasında elektr támiynatınıń turaqlılıǵın támiyinlew máseleleriniń dodalanıwına ayrıqsha itibar qaratıldı. Sonday-aq, kaskadlı óshiwlerdiń aldın alıw, qayta tikleniwshi energiya dáreklerin tarmaqqa jalǵaw hám olardı nátiyjeli ekspluataciyalaw jolları, 2025-jılǵı vegetaciya dáwiriniń juwmaqları hám 2026-jıl máwsiminde suw resurslarınan aqılǵa uǵras paydalanıw perspektivaları kórip shıǵıldı.
Ilajdıń birinshi kúninde Muwapıqlastırıw komissiyasınıń 46-májilisi de óz jumısın basladı. Onda “Ózbekstan milliy elektr tarmaqları” akcionerlik jámiyetiniń qánigeleri de qatnastı.
Májiliste “Ózbekstan MET” AJ Sistemalı xızmetler bas basqarmasınıń baslıǵı Zafar Jwraevtıń atap ótkenindey, bul sóylesiw regiondaǵı mámleketler ushın tek ǵana texnikalıq yamasa tarawlıq máselelerdi sheshiw maydanı bolıp qalmastan, al strategiyalıq birge islesiwdi tereńlestiriw imkaniyatın da jaratadı. Oraylıq Aziya mámleketleri óz-ara qollap-quwatlaw hám tájiriybe almasıw nátiyjesinde ulıwma energetikalıq qáwipsizlikti támiyinlew, turaqlı rawajlanıwǵa xızmet etetuǵın jańa joybarlardı ámelge asırıw imkaniyatına iye boladı.
Jámiyet málimleme xızmetiniń xabarına bola, xalıqaralıq ilaj búgin de óz jumısın dawam ettiredi. Onda Oraylıq Aziya mámleketleri elektr energetika kompaniyaları hám milliy dispetcherlik oraylarınıń basshıları gezektegi májilis baǵdarlaması sheńberindegi máselelerdi dodalaydı.

ÓzA