Mámleketimizde Mádeniy miyras agentligi sistemasındaǵı muzey hám muzey-qorıqxanalarda “Muzeyler hápteligi” bolıp ótpekte.

Bul háptelik dawamında Agentlik sistemasındaǵı jámi 114 mámleketlik muzey hám muzey-qorıqxanalarǵa watanlaslarımız biypul barıw imkaniyatı jaratılǵan.
“Muzeyler hápteligi” dawamında watanlaslarımız milliy muzey fondında saqlanıp atırǵan siyrek ushırasatuǵın eksponatlar hám bahalı kollekciyalar menen jaqınnan tanısıp, bay tariyxıy hám mádeniy miyrasımızdan zawıqlanbaqta.
Bul ilaj Ministrler Kabinetiniń 2010-jıl 12-apreldegi “Ózbekstan Respublikasınıń “Muzeyler haqqında”ǵı Nızamın ámelge asırıw ushın zárúr bolǵan normativlik-huqıqıy hújjetlerdi tastıyıqlaw haqqında”ǵı 68-sanlı qararına muwapıq hár jılı shólkemlestirilip kelinbekte.
Joqarıda keltirilgenindey, Mádeniy miyras agentligi sistemasında 114 mámleketlik muzey jumıs alıp barmaqta. Sonnan 37 si tiykarǵı muzey, 71 muzey filialları hám olardan 6 sı muzey-qorıqxana bolıp esaplanadı.
Maǵlıwmatlarǵa bola, turistler eń kóp barǵan muzeyler besligi anıqlanǵan. Oǵan bola, “Samarqand” mámleketlik muzey-qorıqxanası, “Registon” tariyxıy kompleksi, “Shon-sharaf” mámleketlik muzeyi, “Buxara” mámleketlik muzey-qorıqxanası, “Iyshan qala” mámleketlik muzey-qorıqxanası eń kóp turistler keletuǵın orınlar qatarına kiredi.
Mámleketimizde jıldan-jılǵa ishki turizm potencialı hám sırt el turistleriniń sanınıń artıp barıwı respublikamız tariyxı hám mádeniy miyrasınıń tartımlılıǵınan dárek beredi.

N.Usmonova,
ÓzA xabarshısı