Ózbekstannıń Livandaǵı jańadan tayınlanǵan elshisi Abdusalom Xatamov (rezidenciyası Masqat qalasında jaylasqan) usı mámleket Prezidenti Jozef Aunga isenim jarlıqların tapsırdı, dep xabar bermekte “Dunyo” MA xabarshısı.

Rásmiy máresimnen soń bolıp ótken sóylesiw waqtında Prezident Jozef Aun Ózbekstan Prezidenti Shavkat Mirziyoevqa Livan menen eki tárepleme baylanıslardı rawajlandırıw maqsetinde elshi tayınlaǵanı ushın shın júrekten minnetdarshılıq bildirdi hám sálemin jolladı.
Ózbekstan elshisi, sonday-aq, Livan sırtqı isler ministri Yusuf Rajji menen ushırastı.
Tárepler Livan hám Ózbekstan arasında siyasiy, sawda-ekonomikalıq hám gumanitarlıq baylanıslardı rawajlandırıwdan mápdar ekenin bildiriw menen birge, hár qıylı dárejedegi eki tárepleme saparlardı shólkemlestiriw, mádeniyat kúnlerin ótkeriw hám óz-ara turistler aǵımın arttırıwǵa qaratılǵan ilajlar shólkemlestiriw usınısların qollap-quwatladı.
Esletip ótemiz, Abdusalom Xatamov 2024-jıl 4-fevral kúni Ózbekstannıń Omandaǵı elshisi sıpatında Maskat qalasına barǵan edi. 2024-jıldıń mart ayında bolsa ol Oman Sultanı Haysam bin Toriq Ol Saidke isenim jarlıqların tapsırdı.

Qaraqalpaqstan xabar agentligi