Búgin Ózbekstan bılǵarı sanaatında qanday ózgerisler bolıp atır? Sorawǵa keń kólemli juwap beriw múmkin. Biraq házir taraw jetiskenliklerin sáwlelendiretuǵın ayırım táreplerine itibarıńızdı qaratamız.

Keyingi jılları terini qayta islew quwatlıqları biraz keńeytildi, zamanagóy texnologiyalar engizildi, óndiriste ekologiyalıq talaplarǵa qatań ámel etiw sisteması jolǵa qoyıldı. Eń áhmiyetlisi, mámleket tárepinen eksportqa jaramlı ónimler tayarlawǵa qaratılǵan bir qatar jeńillikler berildi.
Nátiyjede elimizdiń bılǵarı ónimleri regionda óz ornın taptı. Búgin jáhán bazarına da shıǵıp barmaqtamız. Eksport kólemi jıl sayın artıp baratırǵanı, global brendler menen dúzilip atırǵan shártnamalar bul pikirimizdi anıq dálilleydi.
Qıtaydıń Shanxay qalasında “All China Leather Exhibition (ACLE-2025)” xalıqaralıq kórgizbesi shólkemlestirildi. Investiciyalar, sanaat hám sawda ministrliginiń baslaması hám “Wzcharmsanoat” associaciyası menen birgelikte mámleketimiz delegaciyası usı abıraylı ilajda qatnastı. Onda bir qatar iri kompaniyalar menen áhmiyetli kelisimlerge erisildi.
Eń áhmiyetlisi, Aziya kontinentinde balalar ayaq-kiyimi islep shıǵarıw boyınsha jetekshi esaplanǵan “Dr. Kong” brendi endi óz ónimleri ushın bılǵarına Ózbekstannan satıp alatuǵın boldı. Bul kelisim tek ǵana jańa eksport baǵdarı emes, al mámleketimiz bılǵarı ónimleriniń sapa jaǵınan xalıqaralıq standartlarǵa juwap beretuǵının da tastıyıqlaydı.
Sonıń menen birge, Qıtaydıń “Zhenchang Piye Ltd.” kompaniyası da elimizdiń “Hamkor Nur Savdo” kárxanası menen birge islesiwdi jolǵa qoydı. Demek, endi ózbek terisi bir waqıttıń ózinde hám balalar, hám er adamlar ayaq kiyimin islep shıǵarıwda qollanıladı.
Túrkiyanıń “Tesa Deri” kompaniyası menen dúzilgen kelisim bolsa eksport kólemin keńeytiw jolında jáne bir áhmiyetli qádem bolıp esaplanadı. Sonday-aq, Italiyadaǵı “Goodwill Srl” menen sóylesiwler alıp barılıp, Evropa bazarı ushın tayar jelatin ónimlerin islep shıǵarıw hám eksport etiw imkaniyatları dodalandı.
Germaniyanıń belgili ayaq kiyim islep shıǵarıwshısı “Rieker Entwicklungs GmbH” de óziniń jetkerip beriw shınjırına Ózbekstan ónimlerin qosıw niyetin bildirdi. Eger bul joybar ámelge assa, elimizdiń bılǵarısı Evropadaǵı eń abıraylı ayaq kiyim brendlerinen biriniń quramına kiredi.
Hindstannıń “Tata International Limited” hám “KF Exports” kompaniyaları da ózbek terisine qızıǵıwshılıq bildirdi. Ásirese, Tata búgingi kúnde Zara, H&M, Armani sıyaqlı dúnya gigantlarınıń isenimli sherigi ekenin esapqa alsaq, bul kelisim mámleketimiz ushın úlken áhmiyetke iye.
ACLE-2025 kórgizbesi Ózbekstan ushın ápiwayı kommerciyalıq maydan emes, al jańa imkaniyatlar esigi boldı. Dr. Kong, Rieker, Tata sıyaqlı abıraylı kompaniyalardıń óz támiynat shınjırında ózbek terisine orın beriwi – bul tarawda alıp barılıp atırǵan reformalardıń nátiyjesi hám milliy ónimlerimizge bolǵan isenimniń artıp atırǵanınan dárek beredi.
Búgingi kúnde bılǵarı sanaatı tek ǵana ekonomikalıq rawajlanıw faktorı emes, al mámleketimizdiń xalıqaralıq maydandaǵı abırayın bekkemleytuǵın áhmiyetli tarmaqqa aylanbaqta.

Ikrom AVVALBOEV,
ÓzAnıń xabarshısı