Rossiya prezidenti Vladimir Putin Ukrainadaǵı kelispewshilikti sheshiw boyınsha sóylesiwlerdi sozıp, bul arada frontta jańa hújimge tayarlıq kórmekte. Bul haqqında jaǵdaydan xabardar adamlar Bloomberg  agentligine xabar berdi. Evropa mámleketleri hám Ukraina prognozlarına bola, Rossiya armiyası Pokrovsk átirapında iri hújim baslawı múmkin. Rus áskerleri bul qalanı bir jıldan artıq waqıt dawamında iyeley almay atır. Ótken háptede ótkerilgen Ukraina boyınsha sóylesiwlerde Germaniya hám Franciya rásmiyleri Rossiyanıń Pokrovsk janında kúsh toplap atırǵanın dodalaǵan. 29-avgust kúni bolsa prezident Vladimir Zelenskiy Rossiya bul aymaqqa 100 mıń ásker jibergenin málim etti.

Nigeriyada 2-sentyabr kúni júzden aslam jolawshını alıp ketip atırǵan qayıq awdarılıp ketti. Aqıbetinde 60 adam qaytıs boldı. Bul haqqında Al Jazeera xabar berdi. Apatshılıq siyshembi kúni, jergilikli waqıt penen saat 11:00 shamasında júz bergen. Qayıq Tungan Sule qalasınan Dugga awılına baratırǵan edi. Ayrıqsha jaǵdaylar agentliginiń maǵlıwmatlarına bola, qayıq suw astındaǵı terektiń túbirine urılǵan hám awır júk sebepli awdarılıp ketken. Qayıqta tiykarınan hayallar hám balalar bolıp, olar Duggaǵa kewil bildiriw ushın jol alǵan edi.

Meksikadaǵı zooparkte jolbarıs rejelestirilgen baqlaw waqtında veterinarǵa hújim etti. Bul haqqında Daily Mail xabar berdi. Waqıya Xalisko shtatınıń Mazamitla qalasında jaylasqan haywanat baǵında júz bergen. Waqıya sáwlelengen video sociallıq tarmaqlarda tarqalǵan. Onda veterinar Aleksandra Mora jırtqıshtı kózden ótkerip atırǵanda, jolbarıs tosattan oǵan topılıp, hayaldıń kurtkasınan uslap hám moynın tislemekshi bolǵanın kóriw múmkin.

Rossiya prezidenti Vladimir Putin basıp alınǵan aymaqlardan jańa hújimler ushın tramplin sıpatında paydalanbaqta, sol sebepli Ukraina aymaqlardı beriwge razı emes. Bul haqqında prezident Vladimir Zelenskiy Le Point basılımına bergen intervyuinde málim etti. Zelenskiydiń sózlerine bola, ayırım ǵalaba xabar quralları ukraina áskerleri shıǵıs aymaqlardı taslap ketkeninde tınıshlıq ornatılǵan bolar edi, dep jazbaqta. Ukraina prezidenti bul haqıyqatlıqtan uzaq ekenin ayttı. Ol 2014-jılı basıp alınǵan Qrımdı mısal etip keltirdi. Bul basqın Rossiyaǵa 2022-jılı Ukrainanıń qublasın iyelewde tramplin wazıypasın atqarǵan.

AQSh federal sudı Google kompaniyasın paydalanıwshılardıń sırın buzıwda ayıplap, 425 million dollar járiymaǵa tarttı. Bul haqqında VVS xabar berdi. Sudtıń anıqlawınsha, paydalanıwshılar jeke maǵlıwmatlar baqlaw funkciyasın óshirgen bolsa da, Google maǵlıwmatlardı jıynawdı dawam etken. Dawa 2020-jılı berilgen bolıp, shama menen 98 million paydalanıwshı hám 174 million qurılmaǵa tiyisli. Dáslep dawager tárep 31 milliard dollardan aslam kompensaciya talap etken edi.

Iroda Jwraeva, Uluǵbek Twxtaev, ÓzA