Ózbekstan elshisi Nodirjon Turǵunov Abha qalasında Saudiya Arabstanınıń Asir regionı sawda-sanaat palatasınıń bas xatkeri Misfar al-Vidaiy menen ushırastı, dep xabar bermekte “Dunyo” MA.

Sóylesiw waqtında Ózbekstan hám Saudiya Arabstanı isbilermen toparlarınıń wákilleri arasında birge islesiwdi jolǵa qoyıw, elimizge sırt el investiciyaların tartıw, birgeliktegi joybarlardı ámelge asırıw hám basqa da máseleler boyınsha pikir alısıldı.
Ózbekstannıń awıl xojalıǵı hám jer astı baylıqların qazıp alıw tarawındaǵı bay tájiriybesinen kelip shıǵıp, bul tarawlarda óz-ara tájiriybe almasıw hám qánigeler arasında onlayn ushırasıwlar shólkemlestiriw áhmiyetli ekenligi atap ótildi.
Bas xatker Misfar al-Vidaiy sońǵı jıllarda Ózbekstan hám Saudiya Arabstanı arasındaǵı qatnasıqlar hár tárepleme rawajlanıp atırǵanın, óz-ara saparlar sanı artıp atırǵanın atap ótti. Ol, sonday-aq, Saudiya isbilermenleri Ózbekstan tárepi menen birge islesiw ornatıwdan mápdar ekenin bildirip, palata hám onıń juwapker shaxsları bul baǵdarda barlıq háreketlerdi iske qoswǵa tayar ekenin bildirdi.
Ózbekstan elshisi, óz gezeginde, eki mámleket arasındaǵı ekonomikalıq baylanıslardı bekkemlew hám óz-ara sawda kólemin arttırıw boyınsha bir qatar usınıslardı alǵa qoydı.
Ushırasıw juwmaǵında dodalanǵan máselelerdiń orınlanıwın támiyinlew maqsetinde óz-ara sóylesiwlerdi dawam ettiriw haqqında kelisip alındı.

Qaraqalpaqstan xabar agentligi