Prezidentimizdiń “Jaza múddetin ótep atırǵan, qılmısına shın kewilden pushayman bolǵan hám dúzeliw jolına isenimli ótken shaxslardı ápiw etiw haqqında”ǵı pármanına bola, burın jınayat islegen hám jazaǵa tartılǵan 523 shaxs ápiw etildi. Olardıń ayırımlarınıń jaza múddeti qısqarǵan bolsa, ayırımlarınıń jaza túri jeńiliregi menen almastırıldı.

Oliy Majlis Nızamshılıq palatasındaǵı “Adolat” SDP frakciyasınıń májilisinde dáslep bul hújjettiń áhmiyeti, mazmun-mánisi dodalandı. Deputatlar bul hújjet tek ǵana ápiw etilgen puqaralardıń ómirinde emes, al olardıń shańaraǵı, perzentleri hám pútkil jámiyet ushın úlken ruwxıy áhmiyetke iye ekenin atap ótti.
Bul insanıylıqqa qaratılǵan hújjet partiyanıń Saylawaldı baǵdarlamasında belgilengen insan huqıqları menen erkinliklerin támiyinlew, jámiyette ádillik normaların bekkemlew baǵdarındaǵı baǵdarlamalıq wazıypalarına únles ekeni atap ótildi.
Sonday-aq, májiliste Mámleketlik byudjet hám maqsetli qorlar byudjetleriniń 2025-jıldıń birinshi yarım jıllıǵındaǵı orınlanıwı dáslepki tárizde kórip shıǵıldı. Deputatlar partiya elektoratınıń máplerinen kelip shıǵıp, medicinalıq xızmetler, bilimlendiriwdiń sapası, sud-huqıq máselelerinde byudjet qarjılarınıń maqsetli jumsalıwı máselesine itibar qarattı.
Sonıń ishinde, densawlıqtı saqlaw tarawına Mámleketlik byudjetten 19,4 trillion sum yamasa 2024-jıldıń sáykes dáwirine salıstırǵanda 2,8 trillion sumǵa kóp qarjılar ajıratılǵanı ayrıqsha atap ótildi. Sonıń menen birge, esabatta Densawlıqtı saqlaw ministrligine 2025-jıl ushın Mámleketlik byudjet arqalı ajıratılǵan qarjılar jumsalmay qalǵanınıń sebepleri menen qızıqsındı.

Muhtarama Komilova, ÓzA