Pútkil dúnyada sanlastırıw processleri jedel ótip atırǵan bir sharayatta Ózbekstannıń Finlyandiya sıyaqlı aldıńǵı tájiriybege iye mámleketler menen birge islesiwi tarawda jańa imkaniyatlar esigin ashatuǵını sózsiz.

Usı maqsette sanlı texnologiyalar ministri Sherzod Shermatov Finlyandiyanıń Ózbekstandaǵı Ayrıqsha hám tolıq huqıqlı elshisi Ilkka Ryaysyanen menen ushırasıw ótkerdi. Ushırasıw aldınan IT Park Uzbekistan tárepinen ámelge asırılıp atırǵan keń kólemli jumıslar, keleshektegi rejeler, sonday-aq, IT xızmetleri eksportında erisilgen nátiyjeler hám olardı jáne de arttırıw máseleleri haqqında prezentaciya ótkerildi.
Sóylesiw dawamında eki tárepleme birge islesiwdiń perspektivaları hár tárepleme dodalandı. Atap aytqanda, Finlyandiya hám Oraylıq Aziya mámleketlerinde sanlı jalǵanıw siyasatın rawajlandırıw, tarawdaǵı normativlik-huqıqıy hújjetlerdi jetilistiriw hám Evropadaǵı birge islesiwshiler – Finlyandiya, Franciya jáne Baltıq mámleketleri menen baylanıslardı kúsheytiw máselelerine itibar qaratıldı.
Sonday-aq, ministr Evropa mámleketleri menen óz-ara qatnasıqlar rawajlanıp atırǵanın atap ótti. Yaponiya, Koreya, Qıtay hám Saudiya Arabstanı kompaniyaları menen birge islesiw baylanısları keńeyip atırǵanı, kóplegen abıraylı xalıqaralıq IT kompaniyaları IT Park rezidentine aylanıp atırǵanın atap ótti. Ministr Evropa mámleketleri menen de usınday birge islesiwdi jáne de jedel jolǵa qoyıwǵa úlken itibar qaratılıp atırǵanın qosımsha etti.
Ushırasıwda, sonday-aq, mámlekette jaslar ushın múnásip jumıs orınların jaratıw, olardıń IT tarawındaǵı imkaniyatların arttırıw hám sol arqalı IT xızmetleri eksportınıń geografiyalıq imkaniyatların keńeytiw máselelerine ayrıqsha toqtap ótildi. Usı múnásibet penen Finlyandiya kompaniyaların Ózbekstanǵa tartıw, investiciyalıq birge islesiwdi kúsheytiw hám bul processlerde elshixana imkaniyatlarınan nátiyjeli paydalanıw boyınsha da pikir alısıldı.
Ózbekstan hám Finlyandiyanıń birge islesiwi tek ǵana texnologiyalıq rawajlanıw emes, al jaslar ushın múnásip jumıs orınların jaratıw hám mámlekettiń global básekige shıdamlılıǵın arttırıwǵa xızmet etedi.

Nigora Rahmonova, ÓzA