Prezident Shavkat Mirziyoev 4-sentyabr kúni awıl xojalıǵında qosımsha qun shınjırın jaratıw ilajları boyınsha prezentaciya menen tanıstı

Sońǵı jılları bul taraw strukturalıq jaqtan reformalanıp, nátiyjelilikti arttırıw ilajları kórildi. Paxta hám ǵálle maydanları qısqartılıp, azıq-awqat ónimleri ushın ajıratıldı. 160 mıń gektar jańa baǵ hám júzim atızları jaratıldı. 1 milliard dollarlıq 1 mıń 500 azıq-awqat joybarı iske qosıldı.
Biraq awıl xojalıǵında elege shekem jasırın ekonomikanıń úlesi joqarı. Jetistirilgen ónimniń hámmesi de esabatlarda kórsetilmeydi. Azıq-awqat ónimlerin satıwda qosımsha qun salıǵı 12 procentti quramaqta.
Bul másele Ózbekstan Respublikası Prezidentiniń isbilermenler menen ashıqtan-ashıq sóylesiwinde kóterilgen edi. Mámleketimiz basshısı bul baǵdarda diyqan hám fermerlerge qolaylıq jaratıw, salıq júgin jeńilletiw boyınsha juwapkerlerge kórsetpe bergen edi.
Soǵan muwapıq, Xalıqaralıq valyuta qorı, maman sırt el hám jergilikli ekspertlerdiń qatnasıwında awıl xojalıǵın “sayadan” shıǵarıw boyınsha usınıslar islep shıǵıldı.
Oǵan bola, kelesi jılı 1-yanvardan baslap, awıl xojalıǵı kárxanaları diyqan hám fermerlerge ózi jetistirgen awıl xojalıǵı ónimin (ǵálle hám paxtadan tısqarı) satıwda qosımsha qun salıǵı nollik stavkada boladı.
Sonıń menen birge, ónimdi jetistiriwde tuqım, tógin, janılǵı, transport, elektr sıyaqlı qárejetler ushın esapqa alınǵan QQStı qaytarıp beriw ámeliyatı da saqlanıp qaladı.
Nátiyjede fermer hám diyqanlardıń ıqtıyarında jılına 300 milliard sum qarjı qaladı, hám 400 milliard sumlıq salıqtı qaytarıp alıw imkaniyatı boladı.
Ulıwma, bul jeńillikler taraw wákilleriniń ashıq-aydın islewine túrtki beredi, orınlarda iri sanaatlasqan plantaciyalar hám qayta islew kárxanalarınıń kóbeyiwine bekkem tiykar jaratadı.
Juwapkerlerge bul jańa sistemanı diyqan hám fermerlerge túsindirip, nátiyjeli jolǵa qoyıw, azıq-awqat ónimlerin jetistiriwdi xoshametlew boyınsha kórsetpeler berildi.

ÓzA