Baspa jumısı tarawın jetilistiriw, sapalı ádebiyatlardı basıp shıǵarıwdı qollap-quwatlaw, kitapqumarlıq mádeniyatın ǵalaba en jaydırıwǵa qaratılǵan izbe-iz ilajlar ámelge asırılmaqta.

Senattıń onınshı jalpı májilisinde dodalanǵan “Baspa jumısı haqqında”ǵı Ózbekstan Respublikası nızamına qosımshalar hám ózgerisler kirgiziw haqqında”ǵı nızam usı jumıslardıń logikalıq dawamı bolıp esaplanadı.
Sońǵı 4 jılda baspalardıń sanı 3,5 esege kóbeyip, 590 ǵa jetti, sonnan 90 procentin jeke menshik baspalar quramaqta.
Búgingi kúnge kelip baspalardıń óndirislik quwatlılıǵı 2 esege artıp, hár jılı ortasha 11 mıń atamada 40 million nusqada ádebiyatlar basıp shıǵarılmaqta.
Tarawdı rawajlandırıw maqsetinde 25 million dollar muǵdarında tikkeley investiciyalar kirgizilgen. Sonday-aq, 2025-jıl 1-yanvardan baslap baspa kárxanaları payda salıǵın tólewden 5 jıl múddetke azat etildi.
Payda bolıp atırǵan jańa sociallıq qatnasıqlar, alıp barılǵan úyreniwlerdiń nátiyjeleri “Baspa jumısı haqqında”ǵı nızamnıń ayırım normaların jetilistiriw zárúrliginiń bar ekenligin kórsetken. Basıp shıǵarılıp atırǵan kitaplarda balalardıń jas ózgesheliklerine sáykes kelmeytuǵın hám sanasına unamsız tásir kórsetetuǵın málimlemeler sáwlelengeni, ayırımları ámeldegi mámleketlik standartlar talaplarına sáykes kelmeytuǵını, tariyxıy faktler nadurıs tárizde berilgeni, anıq emes hám ilimiy dálillenbegen maǵlıwmatlar bayan etilgeni anıqlanǵan.
“Baspa jumısı haqqında”ǵı nızamǵa basılım bas redaktorınıń huqıqıy statusın belgilew, kitapqumarlıq mádeniyatın xoshametlewge qaratılǵan dúzetiwler kirgizilmekte.
Nızamda bas redaktor baspa redakciyasınıń dóretiwshilik jumısına basshılıq etiwi, baspa tematikalıq rejeleriniń islep shıǵılıwı hám basılımlardıń nızamshılıq talaplarına, baspa jumısı tarawındaǵı texnikalıq reglament (milliy standart) talaplarına muwapıq tayarlanıwı ushın juwapker ekeni belgilenbekte.
Endigiden bılay bas redaktor lawazımına joqarı maǵlıwmatqa hám baspa jumısında keminde úsh jıl jumıs stajına iye bolǵan shaxs tayınlanadı. Bas redaktor shólkemniń shólkemlestiriwshisi yamasa basshısı tárepinen lawazımǵa tayınlanadı hám lawazımınan bosatıladı. Bunnan tısqarı, baspa basılımların shıǵarıw haqqındaǵı qarar bas redaktor tárepinen qabıl etiledi. Ol basılımnıń dóretiwshilik jumısı ushın juwapker boladı.
Nızam menen kitapqumarlıqtı xoshametlew – kitapqumarlıq mádeniyatın ǵalaba en jaydırıw hám arttırıw principi sıpatında belgilenbekte.
Senatorlar maqullanǵan nızam kitaplardı milliy standartlar tiykarında basıp shıǵarıw, kitaplarda nızamshılıqqa hám sociallıq ádep-ikramlılıqqa qayshı mazmundaǵı málimlemeler tarqatılıwınıń aldın alıw hám jámiyette kitapqumarlıq mádeniyatın, baspalardıń sociallıq juwapkershiligin arttırıwǵa xızmet etedi.

ÓzA